Imágenes de Asturias

descargar


Suscríbete

Recibe cada mes el sumario en tu correo

Opinión Firmas Xaviel Vilareyo Una televisión n'asturianu dafechu (2)

Una televisión n'asturianu dafechu (2)

Imprimir E-mail
(0 Votos)
Escrito por Xaviel Vilareyo   
Viernes, 30 de Octubre de 2015 10:51
Nesti duru camín pel que vien andando la nuestra llingua, llenu d'impedimentos políticos y cuando non d'ataques frontales al idioma dende los mesmos poderes públicos encargaos de la so promoción social, el discutir agora sobre modelos correctos o non correctos de llingua pa la radiotelevisión puede ser un síntoma del atrasu nel que nos atopamos güei los asturianos, pues en toos estos años de dominiu televisivu constátase daveres el fechu de que les llingües dominantes yá xeneraron nesti mediu de comunicación un llinguaxe propiu, una clas de subestándar, al qu'el restu les llingües tien qu'adaptase cuasi ensin remediu.

Xaviel VilareyoPel so llau, la radiotelevisión como mediu oral de comunicación yá entamó cuantáyá'l so propiu modelu de llinguaxe, que podemos calificar como prefechu o inventáu pero que se nos presenta anguaño como un llinguaxe fixáu y yá cuasi indiscutible na sociedá y dominante dientro del mediu. Tampoco los ciudadanos y usuarios del idioma podemos agora iguar cuestiones que más que filolóxiques son polítiques y que vienen incluso establecíes nel propiu estatutu asturianu como ye'l mandatu de la promoción y difusión de la llingua asturiana nos medios de comunicación. Hai polo tanto unos elementos estrallingüísticos que s'interponen nesti debate y que pueden llegar a distorsionalu dafechu.
Con too ello, ya pa esclariar el debate vamos concretar que la propuesta equí defendida ye una opción nidia pol segundu criteriu, esto ye, por un modelu o estándar claru de máxima corrección llinguística. Nun hai que confundir normativizar con normalizar.
La radio o la TV nun van normativizar pero sí normalizar una llingua qu'entá inda nun goza anguaño de máximu prestixu y que pel momentu sólo una minoría educada nella dispón d'unos niveles altos de dominiu y de competencia idiomática.
Les cadenes de radiotelevisión asturianes dafechu n'asturianu sirviríen ensin dulda de complementu y de gran apoyu a la escolarización del idioma, siendo por ello necesario afitar que tolos programes s'emitan dafechu n'asturianu pero mui especialmente curiando pola llingua nos programes infantiles y xuveniles ensin concesiones a la dexadez llingüística nin al amestáu castellanizante. Asina mesmo, la mayoría la población d'asturies, anque falante y dispuesta a perfeccionase nel so asturianu, sigue siendo tovía un colectivu cuasi analfabetu na so propia llingua y ello nun porcentaxe demasiao grande. Polo tanto, la radiotelevisión tendrá que facer agora entainando lo que nun fixo la escuela nin los poderes públicos en toos estos decenios: educar al pueblu na so propia llingua pa que la meyore y perfeccione y en dellos casos tamién dáyla pa que la pueda conocer per vez primera.
La propuesta equí defendida ye por un modelu o estándar claru de máxima corrección llinguística. La radio o la TV nun van normativizar pero sí normalizar una llingua qu'entá inda nun goza anguaño de máximu prestixu.
L'únicu camín pa correxir la probura y diglosia na que de recién cayó la nuestra llingua nun ye otru que'l de reforzar los curtios avances na escolarización con un ampliu y decidíu apueste pola función didáctica nel usu modélicu y exemplificador de la llingua na TV y pola firme y constante corrección idiomática nos medios.Una televisión n'asturianu dafechu (2)
La televisión pública y tamién les rexonales y les privaes con desconexones p'asturies habrán entamar emitiendo n'asturianu dafechu, con espacios propios o bien con doblaxe al asturianu y en pareyo habrán facer furacu pa ufiertar unos bonos y entreteníos cursinos básicos y necesarios de conocencia gramatical del asturianu asina como espacios divulgativos y amenos dedicaos al perfeccionamientu del idioma astur, fechos con procuru por espertos igual que se fizo y se fai n'otres autonomíes del estáu con llingua propia.
Una de les funciones que cumplen o que deberíen cumplir los medios de comunicación ye la de protexer les nuestres llingües de los constantes erros, inexactitúes de tou tipu, amestaos y malos vezos orales que davezu se producen na fala popular de la cai. La dexadez o la inercia nos malos usos del idioma puede dexenerar o ensuciar cada vez más la llingua faciéndola cada vez más probe debío al puxu de por exemplu los estranxerismos consiguiendo con ello que la llingua viva presente cada vez menores niveles de calidá nel usu diariu de los falantes. Los medios de comunicación son unos mecanismos mui influyentes nos vezos llingüísticos, y por ello non solo deben curiar del llinguaxe sinón que habríen empeñase n'ufiertar un modelu de llingua curiosu y correctu, esto ye, exemplificador. Sabemos que les llingües nun son uniformes, tampoco l'asturiana, y que toos y caún falamos d'un mou diferente según la nuestra personalidá, pero ello nun quita pa que tamién nos pongamos d'alcuerdu a la hora de fixar un modelu de llingua oral asturiana correctu, claru y llimpiu nel que tolos falantes puedan atopar un patrón o códigu cultu de corrección idiomática nel que poder fixase. Y son precisamente los medios de comunicación social los que meyor pueden facer esta misión de curiar pola calidá de la llingua que falamos.


scroll back to top
 

Una hora menos en Miranda

Entre 2008 y 2014, Xaviel Vilareyo escribió en Fusión Asturias un artículo mensual bajo el nombre Una hora menos en Miranda. Aquí se puede encontrar la recopilación completa de estos trabajos.

Directorio de empresas

silvota_trabajador

Directorio de  Guía de Asturias

Números publicados

portadas

Concejos

mapa_asturias_p