8.4 C
Oviedo
jueves 28, marzo 2024

Kósovu y Asturies

Lo más leído

¡Haz clic para puntuar esta entrada!
(Votos: 0 Promedio: 0)

Nunca olvidaré cuando vi pela televisión a una muyer de Kósovu, represaliada polos serbios, que glayaba: «¡Somos albaneses y queremos falar la nuesa llingua!”. Falar la nuesa llingua; ye esta una frase bien simple y fácil d’entender pero que n’abondos casos resulta problemático por causa d’acciones y decisiones polítiques que pueden impedilo.
Hai acciones polítiques que tienen como fin esterminar llingües, yá seya mediante la marxinación o l’esterminiu físicu de los individuos que les falen, escriban o reivindiquen y tamién mediante la imposición nel territoriu d’otra llingua estranxera que sustituya a la llingua propia del país.
Asina, los serbios, campeones en nacionalismu, lleven munchu tiempu imponiendo pola fuerza y pola llei la llingua serbia en Kósovu y faciendo una política de represión, esterminiu o llimpieza llingüística contra la llingua albanesa que ye la llingua tradicional y mayoritaria de Kósovu. Obligaben a los nenos kosovares a estudiar namás serbiu, prohibíase la enseñanza de la llingua albanesa nes escueles y na universidá, los nomes de los pueblos y ríos, la toponimia kosovar traducíase siempre a la grafía y al idioma serbiu, los profesores o ciudadanos que manifestaben un ciertu nacionalismu albanu yeren represaliaos, marxinaos del trabayu o de puestos de poder o de relevancia cuando non, silenciaos socialmente o simplemente asesinaos por ser albanesistes. Hasta que’l pueblu kosovar dixo “basta” y echáronse pal monte con armes y montaron un exércitu de lliberación nacional pa llograr la so independencia política de la Gran Serbia.
L’asturianu entá nun ye llingua oficial d’Asturies, y ello non por decisión democrática del pueblu asturianu sinón por culpa de decisiones y acciones polítiques. Tamién nesta península d’Hespaña, el nacionalismu hespañolista históricamente fexo de les suyes y entá sigue faciéndolo güei encuantes a tratar d’esterminar llingües que nun seyan la castiellana. Aquellos reales decretos, mediante los que los reis hespañoles prohibíen l’usu o la enseñanza de les llingües non castiellanes tienen la so continuación anguaño nes órdenes polítiques y partidistes d’autoridaes guvernatives provinciales prohibiendo la llingua asturiana en centros docentes, universidá, documentos oficiales, rexistros, toponimia, prohibiéndola a los funcionarios o na televisión. La prohibición y persecucuón del asturianu sigue n’Asturies como podemos comprobar tolos díes nes instancies alministratives, xudiciales y polítiques del país asturianu.
L’asturianu entá nun ye llingua oficial d’Asturies, y ello non por decisión democrática del pueblu asturianu sinón por culpa de decisiones y acciones polítiques llevaes alantre por dellos cabezaleros políticos qu’inda caltienen esi ranciu conceptu del nacionalismu hespañolista más escluyente a la manera de los serbios, que nin siquiera na propia Hespaña cuasi esiste yá.
Recientemente nesta Asturies tamién padecemos los ataques d’otru nacionalismu nuevu y escluyente: el nacionalismu gallegu qu’intenta esterminar la nuestra llingua eonaviega pa introducir otra llingua diferente nomada “o galego”. La llingua galaicoasturiana ye la llingua propia y tradicional de les tierres asturianes del Navia-Eo. Una llingua propia tan estremada del gallegoportugués como del asturianu y qu’hai que protexer por igual.
Asturies y Kósovu tienen munchos asemeyos. Són dos países d’asemeyada estensión territorial que sufrieron una represión llingüística y nacional. Les batalles de Kósovu y Cuadonga contra los musulmanes usáronse al empar como referentes ideolóxicos d’estaos represores. Pero agora Kósovu ye un estáu independiente y somos munchos yá los que lu reconocemos como talu, y gracies a ello, los kosovares pueden oficialmente estudiar, falar, lleer, escribir y ver la televisión n’albanés, que ye la llingua propia del so territoriu. Pero n’Asturies non, inda nun tenemos esi derechu porque hai políticos que s’empeñen pa oponese a la llingua asturiana y a la so reconocencia oficial.
Pero ante estos nacionalismos hespañolista y galleguista más escluyentes, los asturianos tenemos que responder cola fuerza de la razón na mano. Tamién tenemos como pueblu y como individuos el derechu a que se nos escuche, el derechu a glayar ante les cámares de la televisión bien alto que somos asturianos y queremos oficialmente falar y escribir na nuesa llingua asturiana, na nuesa llingua propia asturiana reconocida a tolos niveles como llingua oficial d’Asturies.

¡Haz clic para puntuar esta entrada!
(Votos: 0 Promedio: 0)

Más del autor /a

DEJA UNA RESPUESTA

Por favor ingrese su comentario!
Por favor ingrese su nombre aquí

- Publicidad -

Últimos artículos