Iniciativa pol Asturianu participó na manifestación con delles pancartes.
Una manifestación enllenó les cais d’Uviéu esti sábadu 21 d’abril con representación de partíos, sindicatos, asociaciones y colectivos de toa triba. La marcha, que se desendolcó nun ambiente festivu, arrancó na Estación del Norte d’Uviéu y tardó más d’una hora en percorrer la cai Uría hasta la Plaza la Catedral.
Iniciativa pol Asturianu llevó a la manifestación una pancarta nueva col lema «Oficialidá: el camín constitucional de futuru pal asturianu», xunto a otres pancartes de baberu y de mano, coles que quixeron amosar el máximu sofitu a la convocatoria que fixera la Xunta pola Defensa de la Llingua Asturiana.
Esta manifestación hestórica, ye una de les convocatories que más xente movilizó pola causa del asturianu nos cuarenta años de manifestaciones pol idioma, dende qu’en 1976 Conceyu Bable fixera la primer convocatoria col lema que reclamaba la presencia del asturianu nes escueles. Agora, 40 años más tarde, la manifestación cuntó con representantes de toles formaciones polítiques que lleven la oficialidá nel so programa: Podemos, Izquierda Xunida d’Asturies, Foru Asturies y per primer vegada de forma oficial dende 1976, de la FSA-PSOE.
Iniciativa pol Asturianu ye una organización que ñació pa implicar a tola sociedá asturiana nel procesu de recuperación y normalización del asturianu, y polo tanto celebramos la gran implicación de la sociedá, mayoritariamente favoratible a que l’asturianu se convierta nuna llingua normal y a que pueda usase en tolos ámbitos y que tenga garantizáu’l so futuru, lo que solo ye posible si esta llingua ye oficial.