5.6 C
Oviedo
viernes 29, marzo 2024

Noticies de marzu 2019

Lo más leído

¡Haz clic para puntuar esta entrada!
(Votos: 0 Promedio: 0)

•Presentación del poemariu D’Aire, fueu y deséu
•Grupu informal de conversación n’asturianu nel conseyu
•Les Regueres oficializa la so toponimia

 

Presentación del poemariu D’Aire, fueu y deséuiniciativa-noticies-marzo
El que fore nomáu Embaxador de la Llingua Asturiana, Juan Carlos García Hoyuelos, organiza en comuña con Iniciativa pol Asturianu y l’Academia de la Llingua Asturiana (ALLA) la presentación del so poemariu. Un poemariu multillingüe nel que tán presentes distintes llingües como por exemplu’l valencianu, el catalán, l’aragonés, amás d’otres llingües nes que s’atopa l’asturianu. L’actu foi’l día 18 febreru a les 18:00 hores na sede de la propia Academia, allugada n’Uviéu na Cai L’Águila 10. Nel actu recitáronse poemes d’Aire, fueu y deséu d’ello encargáronse Pablo Texón Castañón (poeta y mayestru), Xosé I. Pidal Montes (poeta), Nicolás Bartolomé Pérez (escritor lleonés, miembru de l’Academia de la Llingua Asturiana y Faceira), Quique Díez Fernández (estudiante de filosofía), Roberto González-Quevedo (poeta y antropólogu lleonés), Nel Morán (escritor), Fernán Morán Suari (Presidente de la Lliga Celta d’Asturies), Xuan Miyar (miembru d’Iniciativa pol Asturianu), Víctor Suárez Piñero (escritor). Darréu pudimos sentir en directu el tema Magar la distancia de Toli Morilla, tema incluyíu nel CD d’Aire, fueu y deséu, col que’l propiu cantautor asturianu collaboró, amás de dellos temes propios xunto a la proyección de videoclips de cantares incluyíos nel CD conseñáu.
Nel propiu actu, el momentu más emocionante foi cuando Iniciativa pol Asturianu fizo entrega, na presentación del proyectu poéticu-musical, del títulu d’embaxador de la llingua asturiana al escritor Juan Carlos García Hoyuelos. Posteriormente declararía: «Ye pa min un honor el que se me nombrara como «Embaxador de la Llingua Asturiana», too un compromisu y responsabilidá que voi a llevar con munchu arguyu, dando a conocer la situación actual del asturllionés y pidiendo encarecidamente la so oficialidad nos territorios onde se fala, como Asturies, País Llionés y nel Distritu de Braganza (Portugal), onde curiosamente yá ye oficial».
La entidá sofitó dende l’entamu esti proyectu qu’entiende como un acercamientu ente toles llingües ibériques y que, sobremanera, ye una bona noticia pa la fastera de fala asturllionesa, territoriu que necesita de axuntar fuercies y texer llazos p’algamar una presencia del idioma muncho meyor fuera d’Asturies.

 

Grupu informal de conversación n’asturianu nel conseyu
D’otra banda, Iniciativa pol Asturianu organiza un añu más, en collaboración col Conseyu de la Mocedá de Xixón, dos grupos de fala abiertos a toles persones que quieran participar. Estos grupos informales tán entamaos pol propiu Conseyu y empobínense a tola xente que quieran perder el mieu a falar en públicu y practicar les sos conocencies nun ambiente informal. Esti grupu nun ye una clas d’idioma, sinón un espaciu nel qu’aconceyar tranquilamente y falar na to llingua, ye dicir, l’asturianu. Va ser nel Conseyu de la Mocedá de Xixón, na cai Manuel Llaneza 68, baxu (33208) tolos llunes n’horariu de mañana de 12:00 a 13:00 y pela tarde de 19:00 a 20:00.

 

Les Regueres oficializa la so toponimia
D’últimes, dende Iniciativa queremos cellebrar que’l conceyu de Les Regueres va convertise nel conceyu númberu 61 n’oficializar la so toponimia tradicional según recueye’l BOPA del día 1 de febreru del presente añu.
Y asina quedaríen namás por aprobar los decretos toponímicos de los diecisiete de los setenta y ocho conceyos asturianos.
¡Haz clic para puntuar esta entrada!
(Votos: 0 Promedio: 0)

Más del autor /a

DEJA UNA RESPUESTA

Por favor ingrese su comentario!
Por favor ingrese su nombre aquí

- Publicidad -

Últimos artículos