Acabamos de celebrar el 8u Festival de Cine Asturianu premiando el talentu de realizadores asturianos como Luis Trapiello, Ángeles Cachón, Teresa Marcos y Juan Caunedo y nesti momentu faise necesario facer una reflexón de conxuntu sobre la situación del audiovisual asturianu. L’Autonomía asturiana padez dende hai abondos años un declive económicu y un declive políticu y alminsitrativu, una degradación política o malgoviernu, incapacidá y pésima xestión de los governantes asturianos, chiscada de corrupción que venimos padeciendo en munchos ámbitos y mui especialmente na preocupante situación actual del audiovisual asturianu. Obligaos tamos ante esti triste panorama a llanzar un llamáu a la sociedá pa que debata y proponga soluciones pa qu’esti estratéxicu sector económicu y cultural pueda sobrevivir n’Asturies. De nun ser asina l’audiovisual asturianu morrerá igual qu’otros sectores económicos d’esta tan maltratada y sufrida sociedá asturiana.
La decadencia de la cultura asturiana en xeneral y del cine asturianu en particular ye reflexu d’una mesma sociedá en decadencia que nun ye consecuencia d’una crisis momentanea o coyuntura pasaxera sinón que ye consecuencia d’una mala política y d’una malísima xestión cultural de los que governaron Asturies durante estos 30 años d’autonomía mayormente xestionada pol PSOE apoyaos por IU. Ye importante que los votantes reflexonemos sobre qué tipu de polítiques y xestión queremos yá que pagamos con impuestos les estructures polítiques qu’apliquen estes xestiones que van en contra de los propios intereses d’Asturies. La trayectoria histórica d’Asturies indícanos qu’otra Asturies meyor ye posible. L’alternativa ye emigrar d’Asturies y convertila nun ermu cultural, social y económicu.
Nun se trata de pidir más dineru públicu, trátase de que lo poco qu’haya tea bien repartío ente los propios asturianos y nun sirva pa engordar productos o empreses de fuera.
Llueu de tantos años de debatir estos problemes n’Asturies llegóse a esta triste conclusión: a los actuales governantes d’Asturies nun-yos interesa qu’esista una industria asturiana del cine y del audiovisual potente porque ye un sector industrial y cultural que nun controlen, manexen o mangoneen pa medrar o aprovechase dél. Como la situación del cine y audiovisual asturianu empeore yo y munchos más vamos entamar a pensar qu’esta conclusión puede ser la más axeitada y verdadera.