La Tierra ta amalecida. Los océanos apinaos de plásticos y más ácidos. El calor xubiendo, los fueos descomanaos y les inundaciones afeutaron a millones de persones.
El cambéu climáticu, los cambeos d’orixe humanu na natura, la deforestación, l’usu del suelu, la superproducción agrícola y ganadera y el comerciu illegal de fauna silvestre puen acelerar el frayamientu del planeta.
Poro, fízose’l Día Internacional de la Ma Tierra fai trés años, dientro del Deceniu de la ONX pa la Restauración de los Ecosistemes. D’ellos depende la salú de la vida terrícola en xeneral. Hai de restaurar los daños fechos, finar cola probitú y torgar el desaniciu masivu. Fai falta una economía caltenible pal ser humanu y la natura na que s’asitia.
Tolos años el mundiu gande 10 millones d’hectárees de viesques. La biodiversidá ye una barrera pal espardimientu los patóxenos. Al rodiu d’un millón d’especies atópense en peligru de desaniciu.
Poro, dientro les aiciones del Estratexa del Deceniu de les Naciones Xuníes tán:
-Empoderar un movimientu mundial. Énte una xera descomanada puen incorporase los grupos y persones que seyan quien a informase de les posibilidaes de restauración na so fastera o entamar la so xera propia.
-Financiar la restauración del tarrén. Los beneficios superen a los costos pero faen falta millones d’inversión d’aniciu, donaciones y conocencies especializaes.
-Afitar los incentivos afayadizos. Les sovenciones a llargu plazu xeneren ingresos más seguros y un mediu ambiente con mayor salú.
-Puxar el llideralgu. Nes campañas de reforestación, la rexeneración de paisaxes degradaos alitarán llíderes ente los pueblos, sobremanera nos pueblos indíxenes.
-Camudar el comportamientu. Nos vezos de consumu qu’escosen les reserves pesqueres y los suelos agrícolas. Nos cambeos de dieta y na promoción de productos de restauración.
-Invertir n’investigación. La ciencia ta desendolcando les víes que puen suponer meyores práutiques pa restaurar el planeta, non namái el so caltenimientu como ta agora.
-Desendolcar la capacidá. De les iniciatives, del financimientu, de les visiones de restauración más afayadices, de los determinos y la implicación de los grupos marxinaos.
-Esparder una cultura de la restauración. Ye un llamáu a los artistes, narradores, productores, músicos y mediadores rexonales pa la rexeneración.
-Construyir la xeneración viniente. Les xeneraciones futures son les más afeutaes pola perda los ecosistemes. Na educación ta la posibilidá d’emplegos caltenibles.
-Escuchar y deprender. Los profesionales de la restauración puen contautar cola ONX pa sofitar el bon camín de les esperiencies a desendolcar pa garantizar un futuru vidable pa toos y toes.
Nun ye un xuegu. Nun hai planeta B.