Una cai pa Xuan María Acebal n’Uviéu. Cursu de creación lliteraria en Xixón. Espulsada d’organización por usar l’asturianu.
Una cai pa Xuan María Acebal n’Uviéu
Con motivu de la creación de delles nueves cais nel conceyu d’Uviéu dende Iniciativa pol Asturianu treslladamos tanto a l’Alcaldía como a los estremaos grupos municipales una propuesta pa qu’una d’elles seya nomada como Xuan María Acebal n’alcordanza y homenaxe del escritor en llingua asturiana del nuesu sieglu XIX, que pol so rigor llingüísticu y altor lliterariu, foi nomáu na so dómina como «Príncipe de los poetes asturianos».
Col envís de llevar alantre esta propuesta presentóse en mano y al traviés del rexistru a tolos grupos municipales, asina como al alcalde d’Uviéu, aguardando que faciliten esti xestu cenciellu en favor de la visibilidá y prestixu de la lliteratura asturiana.
Cursu de creación lliteraria en Xixón
Dientrodel programa de cursos d’Iniciativa pol Asturianu pa los meses de la seronda y l’iviernu, nel que s’incluyen cursos en dellos conceyos y a distancia, la entidá organiza esti añu un cursu de creación lliteraria que va impartir la escritora Vanessa Gutiérrez.
El cursu va centrase n’ampliar les habilidaes del alumnáu y afalagar la so creatividá, al traviés d’exercicios de creación y traducción, llectura y tamién conocencia de la hestoria de la lliteratura asturiana, con especial atención a les décades últimes.
El cursu va impartise los xueves de 19 a 21 hores nel Conseyu de la Mocedá de Xixón, dende’l mes d’ochobre hasta abril. El preciu del cursu colos materiales incluyíos ye de 60 euros (50 pa socios d’Iniciativa). La matrícula pue facese na páxina web d’Iniciativa pol Asturianu, pudiendo resolvese duldes nel corréu info@iniciativapolasturianu.org
Espulsada d’organización por usar l’asturianu
La falta d’oficialidá y d’unes polítiques de sensibilización per parte del Gobiernu d’Asturies producen esti tipu de situaciones de conflictu que se dan en más ocasiones de les que se faen públiques y que ponen a los falantes d’asturianu en situaciones de represión y marxinación por mor de prexuicios llingüísticos que tendríen de tar superaos dafechu.
Dende Iniciativa pol Asturianu solidarizámonos cola falante represaliada y pidimos a la entidá que dea marcha atrás y camude esta política de represión nel usu del asturianu, ufriéndonos como entidá pa poner en marcha un taller de sensibilización cola diversidá llingüística dientro de la entidá.