El conceyu yerbatu acoyó’l pasáu 4 de xunetu una nueva edición de la fiesta de la Oficialidá de la Llingua Asturiana. Un añu más, Iniciativa pol Asturianu participó nesta xornada de reivindicación y de reconocimientu a toles persones que, va 30 años, declararon la oficialidá na Casa Conceyu yerbata. Nesta ocasión, pa soplar les 30 veles na xornada, caltuvimos la nuesa presencia y llevamos la nuesa pancartona de la oficialidá, col mensaxe de “La sociedá asturiana axúntase pola oficialida”. Al igual que va tres décades, el pueblu de Bimenes arrexuntóse xunto a la defensa del patrimonio llingüísticu, los valores y a la previsión constitucional pal asturianu defendiendo la oficialidá del idioma; tócanos güei a nosotros siguir trabayando pa llograr nuevos sofitos a pal lograr esta ferramienta de trabayu pa garantizar drechos y la supervivencia del idioma.
El fechu de defender ensin complexos l’asturianu, faer del idioma un mou d’alcuentru y de convivencia, resulta un exemplu que se puede treslladar al conxuntu d’Asturies: defender la oficialidá nun resta, suma; nun divide, axunta; nun acorta llibertá sinón que llogra ampliala.
Bimenes ye pa toles persones que militamos na reivindicación del asturianu nun faru pa la esperanza del futuru del idioma, pa la so normalización y sobremanera pa caltener la llama viva de la movilización.
La especialidá docente: un fitu d’ilusión y fuercia pal asturianu
Iniciativa pol Asturianu celebró l’anuncia del Ministeriu d’Educación sobre la creación de la especialidá docente de Llingua Asturiana. La organización de reivindicación llingüística considera qu’esta decisión supón un pasu alantre pa la enseñanza del idioma, al meyorar la calidá educativa, reconocer el trabayu del profesoráu y dignificar la presencia de les llingües propies nel sistema educativu. Ye una gran noticia pal asturianu y pal eonaviego, pal nuesu patromoniu llingüísticu en conxuntu, pero toca siguir trabayando.
La organización treslladó amás la so felicitación a l’Asociación de Docentes d’Asturianu y Eonaviegu (ADAE) por caltener y reforzar a lo llargo de toos estos años la movilización en defensa d’esta reivindicación histórica, asina como de los sindicatos. La entidá tamién quiso valorar la xestión del Gobiernu del Principáu d’Asturies ente’l Ministeriu d’Educación pa llograr la modificación de los Reales Decretos que permitirán la creación de les Especialidaes Docentes d’Asturianu y d’Eonaviego.
Por too ello, la presidenta d’Iniciativa pol Asturianu, Arantza Margolles, afirmó que «esta ye la prueba de que la movilización, la denuncia constante y la xuntura de fuercies son el camín pa siguir conquistando nuevos espacios pa la llingua asturiana».
Margolles destacó amás que «esta decisión ye un ésitu d’Asturies y del profesoráu d’asturianu; de toles persones que participaron nel enzarru nel colexu de Cabueñes, de tolos que fueron a movilizase a Madrid y de toles persones que se sumaron nes movilizaciones convocaes por ADAE. Pero tamién ye una victoria de les families que matriculen a los sos fíos y fíes na asignatura, del alumnáu y, en definitiva, de tola llingua asturiana».
La presidenta de la organización sorrayó, sicasí, qu’entá queden importantes avances por algamar nel ámbitu educativu. «Reconocemos, valoramos y celebramos esti pasu, pero tamién queremos siguir avanzando pa garantizar la igualdá y la dignidá del asturianu n’otros ámbitos, como les Escueles Oficiales d’Idiomes o la Formación Profesional».
Na mesma llinia, añadió que «esta ye la demostración de que, frente al pesimismu y a quien sostién que “nun se pue algamar nada”, la única batalla que se pierde ye la que nun se llucha. La movilización de la sociedá da resultaos y esti ye un exemplu evidente». Arantza Margolles quiso tamién reconocer «l’enorme esfuerciu, compromisu y la ilusión» de los centenares de docentes que, durante más 45 años, impartieron la asignatura d’asturianu pese a les dificultaes, pilancos y desprecios. «L’aprobación de la especialidá docente tien d’entendese tamién como un homenaxe a toles profesores y profesores que dedicaron y dediquen la so vida a la enseñanza de les llingües propies», señaló. Pa finar, la presidenta recordó que «Iniciativa pol Asturianu siempre pon en marcha una votación popular pa escoyer la meyor noticia del añu. Probablemente yá tengamos la d’esti 2026, pero eso nun significa que debamos conformanos. La Conseyería d’Educación tien de siguir avanzando na incorporación del asturianu a toles etapes del sistema educativu, recuperar les campañes de matriculación y avanzar escontra un modelu de voluntariedá real que sustituya l’actual optatividá. Agradecemos al Ministeriu d’Educación esti importante pasu, pero’l camín pa llograr la plena igualdá llingüística continúa».
