La reivindicación de la especialidá docente d’asturianu vuelve ocupar estos díes un llugar central nel debate educativu d’Asturies. El enzarru entamáu pola Asociación de Docentes d’Asturianu y d’Eonaviego (ADAE) nel Colexu Públicu de Cabueñes de Xixón ye una muestra clara del cansanciu -pero tamién de fuercia- d’un colectivu que lleva años reclamando daqué tan básico como un marcu profesional dignu pa la so llabor.
La enseñanza del asturianu y del eonaviegu nel sistema educativu asturianu nun ye una realidá nueva nin improvisada. Ye frutu de décades de trabayu del profesoráu, del esfuerciu de les families, del compromisu del alumnáu y de la presión constante del movimientu de reivindicación llingüística. Gracies a esi trabayu calláu, pero constante, miles d’estudiantes tuvieron la oportunidá de conocer, estudiar y valorar les llingües propies d’Asturies.
Sicasí, esi avance convive con una contradicción evidente: la materia de Llingua Asturiana sigue ensin contar con una especialidá docente reconocida oficialmente. Esta situación provoca inestabilidá llaboral, rotaciones constantes nel profesoráu y dificulta la planificación educativa a llargu plazu. Nun se trata solo d’una cuestión alministrativa; falamos de la calidá de la enseñanza y del respetu institucional escontra un colectivu profesional.
Una especialidá docente específica ye una ferramienta imprescindible pa garantizar que la enseñanza de les llingües d’Asturies se desenvuelva con normalidá, con estabilidá y con criterios pedagóxicos claros. Tamién supondría reconocer el trabayu de los y les docentes que, munches vegaes en condiciones precaries, fixeron posible que l’asturianu tenga presencia real nes aules.
El profesoráu que participa nel enzarru ta dando una muestra de compromisu y responsabilidá cola llingua y cola educación pública. Nun reclamen privilexos nin tratos especiales; pidin namás un marcu xustu que reconoza la so profesión y garantice’l futuru de la enseñanza del asturianu y del eonaviegu.
Amás, esta reivindicación nun ye una demanda aisllada. Cuenta col sofitu del profesoráu, de los sindicatos, de les families y de bona parte de la sociedá asturiana. Inclusive la propia Xunta Xeneral d’Asturies manifestó en delles ocasiones el so respaldu a la creación d’esta especialidá. Eso demuestra que falamos d’una cuestión que supera sigles polítiques y que responde a una necesidá compartida.
Agora bien, el sofitu institucional tien de traducise en fechos. Les resoluciones simbóliques son importantes, pero nun basten si nun van acompañaes de xestiones polítiques decidíes. Ye momentu de que’l Gobiernu d’Asturies asuma un papel activu y encabece la reclamación ante’l Ministeriu d’Educación pa facer real, d’una vegada por toes, la especialidá docente d’asturianu.
El profesoráu que participa nel enzarru ta dando una muestra de compromisu y responsabilidá cola llingua y cola educación pública. Nun reclamen privilexos nin tratos especiales; pidin namás un marcu xustu que reconoza la so profesión y garantice’l futuru de la enseñanza del asturianu y del eonaviegu.
La dignificación de les llingües d’Asturies pasa necesariamente pola escuela. Y la escuela, pa funcionar con calidá y estabilidá, necesita docentes reconocíos, plantiyes consolidaes y marcos normativos claros. La especialidá docente nun ye solo una demanda llaboral: ye una cuestión de coherencia, de responsabilidá institucional y de respetu pol nuesu patrimoniu cultural.
Por eso, les movilizaciones d’estes selmanes tienen un significáu que va más allá d’un conflictu sectorial o llaoral.. Son un recordatoriu de que la normalización del asturianu sigue necesitando pasos valientes, como ta siendo l’actitú de les personaes d’ADAE. Y unu d’ellos, ensin dulda, ye l’aprobación inmediata de la especialidá docente.
Noa: una nueva oportunidá pa la normalización del asturianu
Nel añu 2024, Iniciativa pol Asturianu celebró’l so IV seminariu Oficialidá, el camín constitucional de futuru pal asturianu, que nesa edición trató sobre les nueves tecnoloxíes y los idiomes. Dientro d’esi eventu presentemos l’audiovisual Normalizar con intelixencia. L’asturianu énte los retos tecnolóxicos del futuru, nel que analizamos les oportunidaes que la Intelixencia Artificial puede tener pal idioma.
Agora, el Serviciu de Salú del Principáu d’Asturies punxo a furrular una ferramienta d’intelixencia artificial llamada Noa pa xestionar les cites mediques. Va funcionar como un asistente telefónicu que responderá a les llamaes de los pacientes y permitirá pedir cites o facer consultes a cualquier hora.
La intelixencia artificial ta avanzando mui rápido y cada vez forma más parte de la vida diaria. Los asistentes virtuales, los traductores automáticos o los modelos de llinguaxe que pueden escribir testos son exemplos claros d’ello. Ferramientes como Noa pueden resultar mui útiles pa facilitar la comunicación col sistema sanitariu.
el Serviciu de Salú del Principáu d’Asturies punxo a furrular una ferramienta d’intelixencia artificial llamada Noa pa xestionar les cites mediques. Va funcionar como un asistente telefónicu que responderá a les llamaes de los pacientes y permitirá pedir cites o facer consultes a cualquier hora.
Como yá señalamos nel seminariu, estes tecnoloxíes tamién son una oportunidá pa la normalización de les llingües propies. Por eso, dende Iniciativa pol Asturianu queremos que l’asturianu y l’eonaviegu formen parte d’esta nueva IA del SESPA. Esti avance tecnolóxicu nun debería ignorar la realidá sociollingüística d’Asturies. Si una IA sanitaria nun contempla l’asturianu, una parte de la población puede quedar con más dificultaes pa acceder a la información o pa comunicase col sistema sanitariu.
La presencia d’una llingua na intelixencia artificial nun ye algo secundario. Ye una cuestión de drechos, de visibilidá y de normalización. L’asturianu nun puede quedar fuera d’un espaciu tan importante de comunicación actual, sobre too cuando la so incorporación a estes ferramientes ye cada vez más fácil.
El Gobiernu del Principáu d’Asturies vien impulsando polítiques de normalización llingüística y acaba de presentar una nueva Estratexa de Normalización del Asturianu y del Eonaviego pa los años 2026-2030. Por eso sería contradictorio promover l’usu del asturianu n’ámbitos como la educación, la señalética o la comunicación institucional y, al mesmu tiempu, nun tenelo en cuenta nes ferramientes d’intelixencia artificial que crea la propia Alministración.
La innovación pública tien de ser coherente colos compromisos llingüísticos del Gobiernu. El SESPA, como organismu públicu, tien tamién esa responsabilidá. Si Noa incluyera l’asturianu, mandaría un mensaxe claro: la modernización y la realidá llingüística d’Asturies pueden dir xuntes.
En definitiva, la presencia del asturianu na intelixencia artificial d’un serviciu públicu nun ye un caprichu. Ye una decisión importante pal futuru de la llingua. Si queremos que l’asturianu siga vivu nes próximes décades, tien de tar presente tamién nes ferramientes de comunicación del sieglu XXI.
