“Abrise a una llingua ye una manera de tener un suañu común”
Esta foi una frase del discursu que Berta Piñán pronunció na recepción del IV Premiu Nacional de Lliteratura Asturiana nel Teatru Camporamor nel 47 Día de les Lletres Asturianes qu’entamó l’Academia de la Llingua Asturiana.
Nacida en Cañu, nel conceyu de Cangues d’Onís, Piñán pertenez a esa xeneración que consolidó’l llamáu “Surdimientu”, el movimientu lliterariu que modernizó y revitalizó la lliteratura asturiana a partir de los años ochenta. Pero amenorgar la so trayectoria a una cuestión xeneracional sería inxustu. La so voz siempre tuvo una personalidá propia: íntima, delicada y fondamente humana. Una escritura onde la memoria, el territoriu, la infancia, el pasu del tiempu y les emociones cotidianes apaecen trataes con una sensibilidá poco frecuente.
Obres como Vida privada, Temporada de pesca, Un mes o La maleta al agua amuesen precisamente esa capacidá pa construyir una lliteratura fondamente asturiana ensin dexar de dialogar con esmoliciones universales.
Figures como Berta Piñán ayudaron decisivamente a normalizar la idea de que l’asturianu podía ser tamién una llingua d’alta lliteratura, contemporánea, sofisticada y abierta al mundu.
Durante munchos años los escritores n’asturianu tuvieron que cargar nun solo coles esixencies de cualquier creación lliteraria, sinón tamién col pesu de defender la llexitimidá de la propia llingua na que escribíen convirtiéndose n’escritorires-miitantes. Nesi contestu, figures como Berta Piñán ayudaron decisivamente a normalizar la idea de que l’asturianu podía ser tamién una llingua d’alta lliteratura, contemporánea, sofisticada y abierta al mundu.
Que la Academia de la Llingua Asturiana decidiera otorgar-y esti gallardón por unanimidá tien una carga simbólica enorme. Porque Berta Piñán representa poques trayectories tan coherentes, tan comprometíes y tan fondamente venceyaes al procesu de dignificación cultural y llingüística d’Asturies.
Asturies, al premiar a Berta Piñán, reconozse a sigo mesma nuna lliteratura que lleva décades demostrando que l’asturianu nun pertenez al pasáu, sinón al futuru.
Iniciativa pol Asturianu quier sumase tamién a esti homenaxe a Berta Piñán. Gracies, Berta.
La oficialidá: un consensu de toes y toos
Pasó la 47 Selmana de les Lletres pero toca siguir sumando nuevos consensos pol asturianu; nun val quedase nes celebraciones o nel usu simbólicu y festivu del asturianu y del eonaviego una vegada al añu. Dientro del marco d’esta selmana, Iniciativa pol Asturianu participó na manifestación pola oficialidá del idioma.
Nun se trata únicamente d’una cuestión xurídica o alministrativa; falamos de dignidá cultural, de memoria colectiva y de futuru. Falamos, en definitiva, d’Asturies.
Durante décades, la llingua asturiana sobrevivió gracies al esfuerzu silenciosu de miles de persones: families que la caltuvieron viva na so casa, docentes que la defendieron (y defenden como tan faciendo dende ADAE) nes aules y na cai, escritores que la llevaron a la lliteratura contemporánea, músicos que la fixeron sonar n’escenarios de dientro y fuera del territoriu, asociaciones culturales que resistieron cuando paecía más cenciello resignase. L’asturianu nun llegó hasta equí por casualidá. Llegó porque hubo una sociedá que se negó a aceptar que la so llingua fuera considerada de segunda categoría.
Sicasí, la realidá sigue siendo contradictoria. Asturies presume d’una riqueza cultural estraordinaria, pero entá caltién pendiente’l reconocimientu plenu d’una de les sos espresiones más fondes.
La oficialidá necesita dexar de percibise como una bandera de parte pa convertise nun proyectu compartíu de convivencia y respetu.
La oficialidá nun significa obligar a naide a falar asturianu. Nun significa espulsar el castellán, nin llevantar fronteres culturales inesistentes. Significa garantizar derechos a quien sí quiera -llibremente- vivir, estudiar, crear o rellacionase n’asturianu.
Asturies necesita una conversación más madura sobre’l so patrimoniu llingüísticu. Una conversación qu’escape de caricatures como ocurre na Xunta Xeneral del Principáu d’Asturies. La oficialidá nun significa obligar a naide a falar asturianu. Nun significa espulsar el castellán, nin llevantar fronteres culturales inesistentes. Significa garantizar derechos a quien sí quiera -llibremente- vivir, estudiar, crear o rellacionase n’asturianu. Significa protexer una llingua minorizada frente a la erosión del tiempu, la represión y de la indiferencia.
La oficialidá nun puede construyise únicamente dende los convencíos. Necesita tender pontes escontra quienes tienen duldes, escontra quienes tienen mieu a cambeos que quiciabes nun entienden del tou o escontra quienes sienten qu’esti debate nun forma parte de les sos esmoliciones cotidianes. Convencer siempre va ser más útil que separtar.
Por ello, defender l’asturianu nun ye vivir anclaos nel pasáu; ye decidir que’l futuru tamién pueda escribise na nuesa propia llingua.
La oficialidá del asturianu nun va ser el final d’un camín, sinón l’empiezu d’una nueva etapa de normalización, convivencia y reconocimientu.
Y pa algamala van facer falta nuevos consensos. Políticos, sí. Pero sobre manera sociales. Porque les llingües sobreviven cuando una comunidá entera entiende que protexeles nun ye un xestu simbólicu, sinón una manera de protexese tamién a sigo mesma.
