Cúmplese esti añu una década dende que’l llunes más averáu al 15 d’ochobre, fiesta de Santa Teresa de Jesús, se celebra’l Día de les Escritores (12 d’ochobre).
Hai munchos «díes de», ensin dulda, pero dalgunos tienen más relevancia qu’otros polo que representen. El Día de les Escritores trainos a la memoria munches coses. Fainos tornar la mirada al pasáu, a aquelles muyeres escritores que fueron precursores nunes dómines nes que hasta taba mal visto qu’una muyer escribiere y nes que dalgunes tuvieron que firmar les sos publicaciones con nomatos d’home. Mui triste.
Nesta celebración lliteraria hai varies entidaes implicaes en dar visibilidá y reconocimientu a les muyeres qu’escriben (qu’escribimos): la Biblioteca Nacional de España (BNE), la Federación Española de Mujeres Directivas, Ejecutivas, Profesionales y Empresarias (FEDEPE), la asociación Clásicas y Modernas, pola igualdá de muyeres y homes na cultura, y toles entidaes ya instituciones que nos sumamos a esta celebración. Porque esti día tien que ser tamién un recordatoriu pa la sociedá: les muyeres escritores esistimos y les nuestres creaciones son tan valoratibles como les de los escritores varones.
Queremos tener un recuerdu especial pa coles escritores que nos precedieron, que percorrieron un camín mui espinosu y fueron estabazando la sienda pa les que vinimos y vienen detrás. Somos munches y somos, amás, les herederes d’una llucha por salir p’alantre en mediu de tantes torgues.
nesti día tenemos que siguir reivindicando que los nuestros llibros tean nes estanteríes, que se nos tenga en cuenta en toles estayes de la lliteratura y que tengamos sitiu nos foros lliterarios cola mesma consideranza que los escritores.
Algamáronse munchos llogros, pero entá nos queda camín por andar. Durante sieglos les muyeres fuimos tapecíes, ensin dar a la nuestra lliteratura la importancia que merecía, anque tratara los mesmos temes universales que la escrita polos homes. Y si reparamos nos premios, el Cervantes, el Nobel, o inclusive otros de menos renome, vuelven apaecer grandes desequilibrios nos porcentaxes ente los galardonaos. Les muyeres salimos mui desfavorecíes. Dalgo s’avanzó, sí, pero queda muncho por facer.
Poro, nesti día, pero tamién tolos díes del añu, tenemos que siguir reivindicando que los nuestros llibros tean nes estanteríes, que se nos tenga en cuenta en toles estayes de la lliteratura y que tengamos sitiu nos foros lliterarios cola mesma consideranza que los escritores.
Prestaríame terminar poniendo nome a una bona riestra de muyeres qu’escribieron y escribimos n’asturianu nos sieglos XX y XXI. Muyeres de distintes edaes, con diversidá de voces y con trayectories y obra publicada bien diferentes, pero que fueron (fuimos) estabazando’l camín pa que brillare la nuestra lliteratura en dómines y momentos non siempre favoratibles.
Porque les muyeres qu’escribimos en llingües minoritaries o minorizaes sufrimos una doble invisibilidá: la de ser muyeres y la d’escoyer una llingua que tamién tien que lluchar por sobrevivir. Dacuando quedamos tapecíes ente la nublina que nos amaga. Por eso ye importante nomanos. Pa nun dexar que caigamos otra vuelta nel silenciu; y, muncho menos, nun nuevu escurecer ente nós mesmes.
Les muyeres qu’escribimos en llingües minoritaries o minorizaes sufrimos una doble invisibilidá: la de ser muyeres y la d’escoyer una llingua que tamién tien que lluchar por sobrevivir.
Siguiendo l’orde alfabéticu, quiero recordar equí dalgunos nomes de muyeres que dedicaron y dedicamos una parte importante del nuesu tiempu a escribir, compaxinándolo, amás, con otres xeres profesionales, personales y familiares:
Aida Escudero, Aymara González Montoto, Alba Llaneza Pulido, Alejandra Sirvent, Ángeles López-Cuesta, Ana Isabel Medina Zarabozo, Ana Martínez Sierra, Ana Pereira, Ana Rosa Fernández, Ana Vanessa Gutiérrez, Ángeles Carbajal, Arancha Margolles Berán, Beatriz R. Viado, Beatriz Quintana Coro, Berta Piñán, Blanca Fernández Quintana, Carmen Gómez Ojea, Carmen Guardado Parga,Carme Martínez Pérez, Concha Quintana, Consuelo Vega, Cristina Muñiz Martín, Dolores La Galana, Elisabet Felgueroso, Elvira Bravo, Elvira Laurelo, Esperanza Medina, Esther Prieto, Eva González, Helena Trexu, Iris Díaz Trancho, Irma González-Quevedo, Irene Faza Aladro; Isabel Gutiérrez Novo, Laura Marcos, Lola del Gallego Noval, Lourdes Álvarez, Llucía Fernández Marqués, Maite G. Iglesias, María del Carmen Fernández González, María José Hevia, Marga Pedrayes, María Esther García López, María Fernández Abril, María García Díaz, María Teresa González, María Xosefa Canellada, Marián Suárez, Marina Pangua Cuesta, Marisa López Diz, Marta Mori, Mercedes García Amado, Mercedes Ruisánchez, Montserrat Garnacho, Nené Losada Rico, Noelia Ordieres, Paquita Suárez Coalla, Paula Pulgar, Patricia Suárez, Paulina Ciaño, Pilar Arnaldo, Pilar Fidalgo, Pilar Sánchez Vicente, Raquel F. Menéndez, Rebeca Álvarez, Rosa Cunqueira, Sabel de Fausta, Sabela Fernández, Sofía Castañón, Solinca Turbón, Susana Sela, Teresa Lorences, Yolanda Fidalgo y Yose Álvarez Mesa
Y na llingua del Navia-Eo: Adela Conde Valledor, Ana Vega, Aurora Bermúdez Nava, Aurora García Rivas, Carmen Siñeriz Rico, Emma Méndez, María José Fraga Suárez, Susa Argul Muñiz y Teresa López, ente otres.
Seguro que faltarán nomes. Pido disculpes de mano poles ausencies involuntaries. Esta nun quier ser una nómina zarrada, sinón una manera de facer visibles dalgunes de les munches muyeres que contribuyeron y siguen contribuyendo al corpus de la nuestra lliteratura.
Pa toes elles, una bona dosis d’ánimu pa siguir escribiendo nes llingües de nueso y tamién en castellán. Pa les qu’abrieron camín, el nuesu reconocimientu; pa les que tamos nél, la constancia; y pa les que vienen detrás, que nunca tengan que pidir permisu pa escribir nin pa ocupar el sitiu que-yos correspuende.
Xuntes hemos siguir abriéndonos pasu na lliteratura. Pero xuntes, sí. Nun lo escaezamos.
