Querida María Luisa mía, Dirásme qu’hai bastante tiempu que nun te mando llinies pero nun pienses que nun toi pendiente d’ello o que nun pensemos en ti yá que cada día que pasa echámoste de menos.
Na última carta contábesme lo guapo que se ve too per Vedado y les obres de la nueva casa. La verdá que ganes nun me falten de marchar p’allá, paez aquéllo tan guapo y soleyero… Siento que’l to cuñáu morriera nel terremotu de San Francisco, quedamos toos acá mui impresionaos y afectaos por ello. Polo demás dicite que como siempre pasáronsenos les fiestes del branu como nun sospiru. Si tuvieres equí… cómo diben prestate les cucañes acuátiques que llantaron nel muelle que fueron tou un espectáculu o les regates de traineres na playa de San Llorienzu qu’axuntaron a una montonera de xente pergrande con bandes de música perdayures. Custodio participó con otru inventu suyu, con una nueva máquina pa mayar, que causó sensación na Exposición de Trabayos Manuales que ficieron nel Teatru Dindurra. Esti añu fuimos al concursu de bailles asturianos na plaza’l Bibio y vimos tocar al gaiteru de Llibardón, Ramón García, que venía de Nueva York. Na villa tamos mui ilusionaos cola recién presentación del proyectu del tren Xixón-Ribeseya pela costa, el ferrocarril de les cinco villes que-y llamen, y paez que va salir yá nel Boletín de Madrid, a ver qué pasa y si ello da trabayu a munchos que falta fai. Con tanta crisis obrera y social que tenemos acá nestos tiempos sólo va quedar dineru pa pagar y mantener les tropes que se comenta quieren reclutar forzoses pa Marruecos, ye lo que nos faltaba, una guerra pa mayor desilusión. A dicite verdá andamos toos cada día más preocupaos yá que les coses en xeneral tán poniéndose cada vez más difíciles nesti terruñu nuestru. Dende’l triste sucesu de la bomba na boda del rei hai cada día más rexistros de los guardies, la xente de puru miéu yá nun va a los teatros porque tienen medrana de que los catalanes tiren más bombes. Pero sólo ponen guardies d’asaltu a cachear si a un actu acude l’alcalde Ramón Prendes o otru importante de la Diputación, si non nada. A Nando y a Firmu echáronlos de la Zarracina por apoyar la Fuelgona, yá ves cómo les gasten. Dicen que van marchar pa Francia pero nun sé qué va ser d’ellos los probes mozos. Mándente recuerdos. Pero nun són los únicos que quedaron ensin paga.
Cada selmana tenemos una marcha o protesta y la única respuesta del goviernu ye poner más guardies a pasear cola porra.
