Nel añu 804, el rei d’Asturies Alfonsu II funda la diócesis obispal de Veleya (Álaba), dos años depués de crear l’obispáu d’Uviéu como metropolitana del reinu, restaurando y repoblando esta antigua ciudá romana abandonada yá que so madre, Munia, yera alabesa.
La creación d’un obispáu en Veleya, nel oriente del reinu asturianu (ríu Zadorra) yera prueba de la misión real de consolidar y cristianar repoblando tolos territorios de la corona. Veleya foi el segundu obispáu del Reinu d’Asturies, al que pertenecía tola llanera alabesa, que facía frontera col condáu francés de Pamplona. Nel añu 881 l’obipáu de Veleya treslládase más pal oeste, al monasteriu de Santa María de Valpuesta, n’Autrigonia, nuna zona más segura y lloñe de la frontera, pola destrucción de Veleya polos moros. Naz asina l’obispáu de Valpuesta que dura hasta 1087 cuando lu absorve primero Náxera y llueu Burgos. Veleya-Valpuesta foi un pegoyu importante na política d’afitamientu del reinu na llanera alabesa y na integración de los bascones nel Reinu d’Asturia. La repoblación facíase gracies a la construcción de castiellos na frontera oriental como los de Cillórigu, Lantarón, Buradón, Muez… que protexíen a los alabeses. Pero los ataques moros nesta zona del Ebru, ante la pasividá de los pamploneses aliaos agora de los moros y sometíos a ellos, obliguen a Alfonsu III a organizar un golpe d’estáu en Pamplona, implantando en 905 una nueva familia real fiel a Asturies y que s’enfrente con dureza a los moros, naz asina gracies a Alfonsu III el nuevu reinu de Pamplona y con él garantízase una frontera segura y aliada. La espansión de Pamplona pel Ebru, cola ayuda d’Asturia, y la creación hacia 1052 d’un obispáu en Náxera (sustituyendo al de Calagorra) y la espansión del obispáu de Burgos provoquen la desaparición del gran obispáu de Valpuesta en 1087, que llegó algamar dende’l ríu Miera hasta los confines pamploneses.
Abondes són les palabres y rasgos llingüísticos del naciente romance asturianu reflexaos con precisión y esactitú nos Cartularios de Valpuesta yá nel 804, na dómina d’Alfonsu II cuando se repuebla esa fastera. Los Cartularios de Valpuesta són unos tumbos, llibros nomaos asina por conservase tumbaos, que contienen documentos que se remonten al añu 804 como por exemplu los que confirmen presures nel valle de Valdegobía, al otru llau del ríu Ebro y de la senra de Pancorvu. Tán escritos nun proto-romance asturianu y por ello se-yos considera ún de los primeros documentos onde apaecen escrites palabres en llingua asturiana. Los documentos más antiguos daten de los años 804, 844, 864 y 875 nos reinaos d’Alfonsu II, Ramiru I, Hordoñu I y Alfonsu III. El llibru más antigu ta escritu en lletra visigótica, la escritura oficial del Reinu d’Asturies y consta de 204 escritures. Ye mui seguro que l’autor de los escritos nun fuera d’esa parte oriental del reinu por ser ésa una zona fronteriza y de repoblación. Abondes són les palabres y rasgos llingüísticos del naciente romance asturianu reflexaos con precisión y esactitú nos Cartularios de Valpuesta yá nel 804, na dómina d’Alfonsu II cuando se repuebla esa fastera. Exemplos d’esti primer romance asturianu són les palabres: collatu, pielle, ciella (cellera), foz, senra, penna, Penna Rubia, valleliu (valleyu), flumenciello, losaciella, toviellas, fonte, losa, rodil, fueros, custodiero, duen (domno), molín, speyo, semedero, semoyos, eruelas, exida ; les palatalizaciones: llectos, Tellu, penniella (peñiella, diminutivu de peña), tovelles, culiares (cuyares), filios (fiyos), paregios (pareyos), viñal. Són abondos los diminutivos típicos asturianos: forniello, moliniella, quintaniella, fontaniella, nocediello…; los masculinos en –u: Anderazu, Petru, Tellu; los plurales femeninos en –es: salines, pumares, casares, cañares, cuyares, tovelles; contracciones del tipu enna, conna, del, al, ellera…; caltenimientu del grupu –mb-; posesivos de trés xéneros: sos, sue, meo; formes verbales novedoses (pertenez) asina como los típicos dualismos malguelo/mayelo; y formes clares del xéneru neutru asturianu (lo).
