XI Centenariu del reináu de Fruela II d’Asturies

Nesti añu celébrense los 1100 años del reináu de Fruela II como rei d’Asturies. Esti fechu ye perimportante anguañu yá que marca l’entamu de l’actual territorialidá asturiana. El Reinu asturianu qu’hereda Fruela como rei algama dende la llende del ríu Eo hasta’l ríu Deba de Basconia y pel sur dende la llinia divisoria d’agües hasta la mar de les Asturies.
El príncipe Fruela nació n’Uviéu nel 874. Yera’l tercer fíu d’Alfonsu III el Grande remaneciendo nel séquitu paternu hasta 909. Alfonsu muerre nel 910 y los trés fíos, García, Ordoñu y Fruela, deciden repartise’l Reinu Asturianu.
Ordoñu, predilectu del padre, tenía meyor derechu sobre Galicia pues governábala dende trece años. Fruela quedó cola parte histórica, primixenia y más segura, el territoriu tresmontanu d’Asturies. García, primoxénitu, pretendía hexemonía pero quédase cola más difícil parte: la espansiva y conflictiva tierra mesetaria.
La partición del Reinu Asturianu foi un fechu anormal, escepcional y forzáu por problemes ente hermanos y porque Ordoñu yá tenía’l goviernu delegáu de Galicia. García sublevárase contra so pá que lu pieslla nel castiellu de Gauzón, dando llugar a qu’Ordoñu y Fruela ficieren valer derechos de fidelidá. Resurdió la teoría xermánica d’escoyer rei y los derechos del primoxénitu pónense en dulda. El repartu foi una solución ante les aspiraciones esclusives de García. Fruela II y la reina Nunilo són reis soberanos d’Asturies, unxíos y proclamaos en 910 na catedral d’Uviéu onde prueben vinculación y preferencia por esti territoriu donando a la Ilesia d’Uviéu un grandiosu regalu: la Caxa de les Ágates.
Fruela II y la reina Nunilo són reis soberanos d’Asturies, unxíos y proclamaos en 910 na catedral d’Uviéu onde prueben vinculación y preferencia por esti territoriu donando a la Ilesia d’Uviéu un grandiosu regalu: la Caxa de les Ágates como gratitú por merecer a títulu de rei les tierres orixinaries d’Asturies. Lleva grabada la Cruz de Pelayu en plata como símbolu del comienzu del so reináu nel territoriu primordial d’Asturies.
Fruela II afírmase n’Asturies como soberanu teniendo una meyor relación con Ordoñu yá que dambos temíen que García nun respetara’l repartu. En 912 dona a la Ilesia ovetina abondos llugares, como Banduxu, confirmando privilexos coles pallabres Froila rex et Nunilo regina.
La separtación de les tierres del Eo al Deba de Basconia confirieron al reináu de Fruela II una independencia política nun territoriu cuasi igual al d’Alfonsu I pero cola ventaya de la seguridá y ausencia de guerres. Los actos oficiales adórnense con gran signu de realeza nos años 910 y 924. La donación de la Caxa pruébalo y ye símbolu de maxestá. En 912 na donación a la Ilesia d’Uviéu de Gozón, Bárcena y Luerces failo col títulu de “Fruela rei, fíu de los reis Alfonsu y Ximena”.
En 914 muerre García en Lleón y Ordoñu sucédelu. Fruela II sigue reinando nel so territoriu asturiense.
Na Llébana, Fruela II foi mui popular, testimoniándose que reinaba’l príncipe Fruela en 914 y en 915 reitérase que Fruela reinaba n’Asturies. Nesti territoriu hai abondes menciones al so reináu n’Asturies como “el nuestru príncipe Fruela” o “rei n’Uviéu”.
En 916 confirma’l cenobiu de Valdecésar, en 918 dona Candás a la Ilesia ovetina. Vuelve casar cola princesa Urraca. Realiza en 922 el camín hacia la meseta per Somiedu onde dexó la inscripción “Fuit facta vía Regnante Froila cum Urraca conyuge”.
El 20 de xunu de 924 muere Ordoñu y Fruela II sucede al so hermanu, volviendo a xuntase tolos territorios del Reinu d’Asturies. Fruela II tenía devoción por Compostela y ye acá onde se proclama el 28 de xunu de 924 como soberanu de tolos territorios asturianos, donando de les doce milles alredor de la basílica de Santiagu. San Martín de Turieno remembra a Fruela como “regnante príncipe nostro Froilani in Asturias”. Convalida Tuñón y autoriza’l cartulariu de Samos cola espresión “Froila rex confirmat”. Confirma a Hermenexildo, obispu de Compostela donándo-y Montaos y Valga. Autoriza al abade Atanrico un monasteriu en Katicas donándo-y ilesies. Dona a San Isidru de Dueñas. Confirma al abade Atanarico y a San Andrés de Parameno. Castigó a los condes en Carrión, executó a los fíos d’Olmundo y destituyó al obispu de Lleón Fruminiu.
En 925 muerre Fruela II. Los sos fíos sufrieron una griesca ente primos pola corona d’Asturies. El fíu d’Ordoñu apresólos y cególos. Alfonsu IV Froilani sólo ye rei per un añu. Los cuerpos del rei Fruela II y Nunilo lleváronse darréu pa la ilesia de Santa María d’Uviéu.