L’interés pola oficialidá enllena l’Aula Magna de la Universidá d’Uviéu

iniciativa-asturianu-banda-logo
[Total:0    Promedio:0/5]

El Seminariu: Oficialidá, el camín constitucional de futuru pal asturianu, inauguráu pol Rector de la Universidá d’Uviéu, Santiago García Grada, y el presidente d’Iniciativa pol Asturianu, Inaciu Galán, apurrió información a la sociedá sobre esta midida llegal pa preservar el patrimoniu llingüísticu y los drechos de los falantes.

iniciatica-congreso

Facemos una esbilla de les intervenciones feches polos espertos participantes:

Xosé Antón Rodríguez Riaño, presidente de l’Academia de la Llingua Astiuriana.
-Reclamó’l cumplimientu de la Constitución nel ámbitu llingüísticu n’Asturies: «Nosotros somos los constitucionalistes».
-Defendió una oficialidá por fases. Llamó a ser realistes y aseguró que «nun vamos ver una oficialidá a plenu rendimientu nos próximos ocho años».
-Apostó por treslladar la oficialidá a los conceyos con «entes suprallocales de normalización». Destacó l’avanzáu estáu del procesu d’oficialización de la toponimia tradicional, pero reclamó una normativa que permita garantizar el so usu.
-Descartó la creación de nuevos canales y apostó por una RTPA na qu’asturianu y castellán convivan al 50%. «Sedría un bon exemplu de convivencia de dambes llingües». Sobre los medios privaos, pidió «un esfuerzu» pa normalizar l’usu del asturianu.
-Reclamó un «consensu pola oficialidá».

José Manuel Pérez Fernández, lletráu del Tribunal Constitucional
-Esplicó que la primer referencia constitucional a la diversidá llingüística fízose na constitución republicana de 1931.
-Diferenció ente llingua propia y llingua oficial y criticó al TSXA poles anulaciones de les ordenances nos conceyos. «Prez ser que’l TSXA nun entiende la distinción ente dambos conceptos».
-«Non, la oficialidá nun supón que los funcionarios tean obligaos a saber asturianu». Concretó que les alministraciones sí puen establecer l’asturianu como requisitu pa determinaos puestos o valoralu como un méritu más.
-«La oficialidá ye un compromisu pa les alministraciones, non una obligación pa los ciudadanos».
-«Nun hai un modelu únicu d’oficialidá. Cada territoriu tien que desarrollar el suyu propiu».

Xosé Alba Alonso, profesor d’Economía aplicada.
-«Suel dicise que la oficialidá ye un desastre económicu y ye tolo contrario».
-Les comunidaes autonomes con llingua propia son les que meyores previsiones tenien de crecimientu acordies colos datos de Funcas.
-Ensin oficialidá, Asturies baxó del 2% del PIB y perdió población nos caberos 30 años. Ta a la cabeza en defunciones y a la cola en nacimientos. Asturies, xunto a Andalucía y Murcia foi la comunidá con menor crecimientu de la renta.
-«Que tener llingua oficial ye un atrasu ye mentira. Y mui gorda».
-«Nun hai demostración que’l costu de la oficialidá seya de 73 millones».
-«Nun hai argumentos económicos pa refugar la oficialidá».

Xuan Bello, escritor
-A la dirección del PP n’Asturies: «Nun somos contrincantes. Somos vecinos, ciudadanos».
-«Yo creo qu’agora sí vamos tener oficialidá y va ser exemplar y una referencia pa les demás».
-«Los políticos y la sociedá tienen la obligación de facer una oficialidá que seya un exemplu pa España y pa Europa».

 

DEJA UNA RESPUESTA

¡Por favor, introduce tu comentario!
Por favor, introduce tu nombre aquí