Noticies. Mayu 2019

0
90
Iniciativa pol Asturianu
Iniciativa pol Asturianu
[Total:0    Promedio:0/5]

Iniciativa pol Asturianu participó nes “XXVI Chornadas d’as luengas d’Aragón” con una ponencia sobre la normalización al traviés de los medios

Inaciu Galán dio una conferencia que llevó’l título de “L’asturianu: creando cultura (y normalizando) al traviés de los medios”

Inaciu Galán, presidente d’Iniciativa pol Asturianu, participó el pasáu sábadu 13 d’abril nes “XXVI Chornadas d’as luengas d’Aragón”, entamaes pola organización Nogará, echando una conferencia baxo’l título de “L’asturianu: creando cultura (y normalizando) al traviés de los medios”. Galán comentó na so intervención que “los medios de comunicación tienen un papel esencial na normalización de les llingües porque son una forma de mantener vivu l’idioma y que la sociedá vea como dalgo normal el poder sentir un informativu o poder lleer una crónica deportiva na to propia llingua. Tamién ye una manera de da-y prestixu al idioma”.
Dientro d’estes xornaes tamién se faló de la oficialidá del asturianu y del aragonés. Galán recalcó que “tuvimos n’Aragón recordando qu’equí tamién se fala una llingua, l’aragonés, que como l’asturianu alcuéntrase nuna situación de desigualdá al nun contar estos idiomes col estatus d’oficialidá. La falta d’oficialidá del aragonés y del asturianu ye anticonstitucional y ye una situación que tien que correxise. Vamos trabayar xuntos nel camín de la normalidá y de la oficialidá d’estes dos llingües”.
El presidente d’Iniciativa pol Asturianu dixo tamién que “una de les meyores maneres de xustificar los medios de comunicación públicos ye afitar y aumentar la presencia de conteníos na llingua propia de los territorios. Esti argumentu a favor de la presencia de llingües como l’aragonés o l’asturianu nos medios públicos ye importante porque estes llingües marquen la diferencia de conteníos nuna televisión pública”.
Galán recordó que “dende Iniciativa pol Asturianu venimos trabayando dende va tiempo en pedir a los partíos una mayor presencia del asturianu na RTPA, amás ficimos propuestes como la de crear una dirección de conteníos dientro del ente porque entendemos que la llingua asturiana tien que tener una mayor presencia na radio y na televisión pública d’Asturies”.
Inaciu Galán acabó anunciando que “pa Iniciativa pol Asturianu los medios son una ferramienta pa normalizar la llingua asturiana y por ello dientro del seminariu que tamos preparando pal 17 y 18 de mayu, vamos contar con un alderique sobre’l papel de los medios de comunicación na normalización del asturianu”.


Iniciativa pol Asturianu axuntó na so pancarta a los partíos pola oficialidá na manifestación en Xixón

“Oficialidá: el camín constitucional de futuru pal asturianu” foi el lema utilizáu pola organización na manifestación del pasáu sábado 6 d’abril nes casi de Xixón

Iniciativa pol Asturianu participó na movilización na tarde del pasáu sábado 6 d’abril nes cais de Xixón convocada pola XDLA. La organización sumóse a la convocatoria llevando la so pancarta pol consensu constitucional pola oficialidá del asturianu. Amás de directivos y socios d’Iniciativa pol Asturianu, representantes de diferentes fuercies polítiques con representación institucional y que defienden la oficialidá tuvieron nel cortexu de la ONG.
Pa Inaciu Galán, presidente d’Iniciativa pol Asturianu, la presencia d’estos partíos na so pancarta “consiguió dar cuenta de la tresversalidá, la mayoría social y el consensu xeneralizáu qu’axunta la oficialidá de la llingua asturiana y del gallego-asturianu, que toca a partíos de tol espectru políticu”.
Galán dixo que “güei manifestamos y recordamos en Xixón que la oficialidá ye la ferramienta constitucional que va permitir la igualdá de derechos llingüísticos n’Asturies. La oficialidá ye la ferramienta que va facer real el cumplimientu de la Constitución Española, qu’establez la oficialidá pa toles llingües d’España nel so artículu 3.2”. El presidente recordó que “nun val namás con dir a manifestase, hai que dar más pasos, nel día a día de cada persona, nes asociaciones, nes empreses, nes instituciones, defender la oficialidá tien que venir acompañáu de la coherencia d’usar l’asturianu en tolos ámbitos de la vida”.
Pa Iniciativa pol Asturianu “agora ye’l momentu de trabayar pa facer medrar les bases del consensu y sumar a los partíos con representación parllamentaria qu’entá nun tán apoyando l’aplicación del artículu 3.2 de la Constitución española, qu’establez la oficialidá pa les llingües acordies colos estatutos d’autonomía”. La formación vuelve a pidir a PP y Ciudadanos que “reflexonen sobre la so postura, en clara contradicción col so llabor n’otros llugares onde gobiernen y sí apoyen y desarrollen la oficialidá”.
Dalgunos de los representantes políticos presentes na pancarta d’Iniciativa pol Asturianu foron Mariluz Pontón, responsable d’Educación, Universidaes y Normalización Llingüística de la executiva de la FSA; Diego Valiño, conceyal PSOE Uviéu, Juan Ponte, númberu 2 de Xuníes Podemos al Congresu; Lorena Gil, candidata de Podemos a la Xunta Xeneral; Angela Vallina, eurodiputada y candidata d’Izquierda Xunida.
Tamién tuvieron presentes militantes d’estos partíos y de Ciudadanos, PP y Foro Asturies.

DEJA UNA RESPUESTA

¡Por favor, introduce tu comentario!
Por favor, introduce tu nombre aquí