Noticies payares 2019

0
71
Iniciativa pol Asturianu
Iniciativa pol Asturianu
[Total:0    Promedio:0/5]

autobús urbano en Avilés

Iniciativa pol Asturianu anima a los conceyos d’Avilés, Castrillón y Corvera a usar l’asturianu nos autobuses urbanos

La organización plantega que los responsables municipales aconceyen cola empresa pa que l’asturianu entame a tener visibilidá nos autobuses.

El presidente d’Iniciativa pol Asturianu, Iván Llera, propon a los conceyos d’Avilés, Castrillón y Corvera l’usu del asturianu y de la toponimia oficial nes llínies d’autobús urbanu. El presidente de la organización comentó que “anque somos conscientes de que la xestión del tresporte ye privada, facemos un llamáu a los responsables de los tres conceyos pa proponer un alcuentru col Consorciu de Tresportes y la empresa concesionaria del serviciu pa fomentar l’usu del asturianu y l’emplegu de los topónimos tradicionales na cartelería de les llínies”.

Nesi sentíu, Llera recordó que “tovía queden munches coses que facer dende los conceyos y l’usu del asturianu nun elementu de tanta visibilidá como son los tresportes ye esencial pola presencia pública que tienen”.

El presidente de la organización amestó que “nesi sen, hai que señalar qu’esta propuesta nun va xenerar un costu adicional pa la empresa, pudiendo collaborar les mesmes instituciones municipales na torna de la cartelería y llogrando d’esta manera normalizar l’idioma d’una forma tan cenciella y barata”.


Iniciativa denuncia la falta de profesoráu d’asturianu en, al menos, 7 centros educativos públicos y celebra l’incrementu de la demanda de l’asignatura ente l’alumnáu

alumnos en clase“Esta selmana conocimos el casu del IES de L’Infiestu onde propuxeron a los alumnos abandonar asturianu ya incorporase a otres asignatures”

Iván Llera, presidente d’Iniciativa pol Asturianu, denunció que “la falta de profesoráu d’asturianu ta provocando qu’en más de 7 centros educativos públicos d’Asturies haya problemes cola asignatura de Llingua Asturiana. Esta ye una realidá que se lleva repitiendo durante varios cursos y que nun camuda”.

El presidente de la organización comentó que “la mala planificación provocó que se formara mui poca xente (nel Máster, especialidá d’asturianu) yá qu’únicamente la especialidá tenía namás 3-4 places, hasta que l’añu pasáu pasó a 10, tres la nuesa reclamación, pero de manera evidente sigue siendo insuficiente pol crecimientu de la demanda nos centros”.
Iván Llera desplicó tamién que “dende Iniciativa pol Asturianu esiximos que se regularice la situación del profesoráu d’asturianu pa consiguir estabilidá na bolsa d’asturianu y evitar que los profesionales dexen esta bolsa y opten a otres asignatures, básicamente castellán, onde pueden sacar plaza”.

“Amás, como yá ficimos n’otres ocasiones consideramos que ye imprescindible que s’amplíen les places del Máster y al mesmu tiempu se faiga una campaña pa dar a conocer la demanda d’empléu creciente qu’hai nesti campu”, propunxo Llera.

Tamién apuntó que “sería interesante que’l profesoráu con plaza fixa de castellán y formación como profesor d’asturianu puedan asumir hores (hailos en cuasi tolos centros) d’asturianu. Esto faise en dalgunos centros y podría suponer otra opción pa iguar esta situación de falta de profesoráu d’asturianu nun momentu nel que sigue medrando la demanda d’asturianu ente l’alumnáu de los centros”.

El presidente d’Iniciativa amestó que “esta situación amuesa la bona demanda de l’asignatura d’asturianu ente l’alumnáu pero tovía esta selmana conocimos el casu del IES de L’Infiestu onde propuxeron a los alumnos abandonar asturianu ya incorporase a otres asignatures. Esto resulta inaceptable”.

P’acabar, el presidente dixo que “ye vital que s’impulse la especialidá definitivamente, pa permitir dignificar l’asignatura y respetar los drechos llaborales de los profesores. Dende Iniciativa pol Asturianu creemos que tien que ser una prioridá del nuevu Gobiernu d’España, que igue una situación inxusta y dignificar de manera definitiva la llabor de los docentes d’asturianu”.

DEJA UNA RESPUESTA

¡Por favor, introduce tu comentario!
Por favor, introduce tu nombre aquí