Noticies d’abril

Plan pilotu pal asturianu como llingua vehicular en primaria • L’asturianu n’Educación Infantil • Ñaz la ‘Cerveza pol asturianu’.

Plan pilotu pal asturianu como llingua vehicular en primaria

Iniciativa pol Asturianu amosó estes selmanes atrás el so apoyu al plan pilotu que se va poner en marcha a la lo llargo del próximu cursu. Esta midida ye un fechu positivu y que va na llinia de lo qu’ha ser un verdaderu procesu de normalización, magar qu’entamar en namás diez centros, dempués de cuasi cuarenta años de retrasu d’esti procesu, paez insuficiente y demasiao lento.
Sicasí, ye importante recordar que l’asignatura de Llingua Asturiana vien tando en marcha dende 1984 de forma voluntaria dn tolos niveles, inclusive compitiendo en secundaria con asignatures mui atractives, y que les families y l’alumnáu vienen acoyéndola con gran ésitu, magar les torgues puestes en dellos centros. Esto da una base bien esperanzadora pa la puesta en marcha del procesu d’introducción del asturianu como llingua vehicular d’otres asignatures.
Hai que recordar qu’amás d’esti apoyu de les families los sindicatos asturianos y estatales amosaron yá’l so sofitu a estes midíes.
Agora ye importante planificar bien esti procesu, pa que seya esitosu, xenerar los materiales necesarios, la formación que’l profesoráu precise y la promoción afayadiza de la midida.

L’asturianu n’Educación Infantil

La noticia de la ufierta pal próximu cursu de l’asignatura de Llingua Asturiana n’Educación Infantil ye bien positiva tamién, y vien a terminar con una illegalidá, pues la Llei d’Usu del asturianu de 1998 determinaba la obligación pa l’alministración d’ufiertar l’asignatura en tolos niveles educativos.
Ye necesario, pa cumplir dafechu la llexislación, qu’esta ufierta s’estienda a otros niveles onde entá nun llega, talos como la FP, FP básica y otros estudios reglaos qu’entá nun cuenten cola ufierta d’asturianu.
Amás, ye de suma importancia la reconocencia inmediata per parte del Ministeriu d’Educación de la especialidá docente d’asturianu pal profesoráu, que vive en condiciones llamentables de continua interinidá, xenerando situaciones que nun permiten garantizar la calidá del enseñu, con una gran inestabilidá.
Animamos a les families asturianes a reclamar nos sos centros que s’apliquen estes midíes, y recordamos que la llei garantiza que con qu’un solu alumnu o alumna quiera matriculase na asignatura, esta ha d’impartise nel centru, un modelu qu’habría estendese, como drechu humanu que ye, a la posibilidá de tener l’asturianu como llingua vehicular d’otres asignatures.

Ñaz la «Cerveza pol asturianu»

Nel Día Internacional de la llingua materna, Iniciativa pol Asturianu presentó en sociedá la «Cerveza pol Asturianu» col lema «La cerveza que-y presta a la to llingua».
Iniciativa pol Asturianu en pallabres del presidente la organización, Inaciu Galán pretende: «Ufiertar al públicu un productu de calidá col que faer atractivo collaborar con Iniciativa pol Asturianu y el nuesu llabor, col qu’introducir l’usu del asturianu n’espacios onde davezu nun suel tar presente […] una forma prestosa de da-y sofitu al asturianu, con un xestu tan cenciellu como tomar unes cerveces colos amigos en cualquier establecimientu, o llevales pa casa y poneles nuna cena».
La entidá presentó esta nueva cerveza, fabricao pola empresa asturiana «Bayura Asturies Craft Beer», firma que dende’l so entamu tuvo’l procuru d’usar l’asturianu tanto nos etiquetaxes como nes promociones. Comprometíos pa col nuesu idioma, la compañía declaró qu’asoleyaba un productu «pa tolos públicos» y fecho con «ingredientes naturales».