Iniciativa pol Asturianu abrió’l plazu de matriculación nos sos cursos d’asturianu de seronda
La organización ufierta nuevos cursos d’asturianu (nivel básicu 1 y nivel básicu 2) que van tener llugar en Xixón, amás de la vía a distancia.
Iniciativa pol Asturianu abrió’l plazu de matriculación p’apuntase a los nuevos cursos d’asturianu (nivel básicu 1 y nivel básicu 2) que van tener llugar en Xixón, amás de la vía a distancia al traviés d’una plataforma dixital.
Los cursos presenciales seríen de llunes a xueves de 19:00 a 21:00 hores. El nivel 1 sería los llunes y miércoles y el nivel 2 sería los martes y los xueves.
Los cursos van tener una duración de 36 hores llectives y entamaríen el llunes 7 d’ochobre y acabaríen el 13 d’avientu, aproximadamente.
El nivel inicial ta empobináu a persones ensin conocimientos d’asturianu o con nivel baxu de conocencia ya inclúi, pa les persones que lu superen, un diploma de l’Academia de la Llingua Asturiana, entidá reconocida pola Conseyería d’Educación pa la formación del profesoráu.
El nivel II ta empobináu a persones con una conocencia más fonda del idioma, que yá ficieren dalgún cursu enantes.
El preciu de la inscripción ye de 60,00 € (50,00 € pa los socios d’Iniciativa pol Asturianu), incluyendo los materiales necesarios pa llevar alantre’l cursu.
Los cursos han de tener un nivel mínimu d’alumnáu qu’en casu de nun llegar va ufríse la posibilidá de facelu na modalidá non presencial.
Les inscripciones pal cursu pueden facese nun formulariu na propia páxina d’Iniciativa pol Asturianu, onde tamién s’alcuentren toles condiciones pal mesmu. El plazu d’inscripción acaba el martes 1 d’ochobre.
Iniciativa pol Asturianu pide l’usu de la toponimia oficial d’Uviéu
“La toponimia ye una parte de la cultura de la ciudá d’Uviéu y nun puede ser un elementu de división porque esa división nun esiste na sociedá uvieína”
Iván Llera, presidente d’Iniciativa pol Asturianu, pidió güei l’usu de la toponimia tradicional del conceyu d’Uviéu nos carteles de les fiestes de San Mateo. Llera aprovechó pa recordar que dende va dellos meses la toponimia d’Uviéu ye oficial y les alministraciones tienen la obligación d’usala.
Llera amestó que “dende va unos años venía utilizándose’l topónimu d’Uviéu en diferentes publicaciones municipales, inclusive gobernando Gabino de Lorenzo” y recordó que “la Llei 1/1998, de 23 de marzu, d’usu y promoción del asturianu aprobada por el PP establez nel so Artículu 15.1 l’usu y la promoción de los topónimos tradicionales”.
Por ello, pedimos al Gobiernu del Conceyu facer un usu normal de los nomes tradicionales de la ciudá y los pueblos”.