•Iniciativa pol Asturianu tresllada al Conseyu d’Europa el creciente consensu social y políticu alredor de la oficialidá
•Iniciativa pol Asturianu entamó una campaña en defensa de la oficialidá en diferentes puntos d’Asturies
Iniciativa pol Asturianu tresllada al Conseyu d’Europa el creciente consensu social y políticu alredor de la oficialidá
Miembros d’Iniciativa pol Asturianu aconceyaron na mañana del llunes 10 d’avientu con representantes del Conseyu d’Europa que s’alcuentren n’Asturies preparando’l so informe sobre la situación de la llingua asturiana y los drechos llingüísticos nesta comunidá autónoma.
Los componentes d’Iniciativa pol Asturianu amosaron a los responsables del Conseyu d’Europa la situación de falta de drechos llingüísticos que se ta viviendo nestos momentos n’Asturies y van facer llegar el documental «La vida ensin oficialidá. Les consecuencies de la falta drechos llingüísticos n’Asturies» nel que s’amuesen graves casos de discriminación llingüística.
Dende l’asociación destacaron amás el creciente consensu social y políticu alredor de la oficialidá y de la conservación del idioma.
Tamién desplicose la llabor d’Iniciativa pol Asturianu y el trabayu continuau en defensa del idioma denunciado diversos casos de discriminación, vulneración de la Llei, falta de profesoráu y diferentes campañes que desarrolla la organización pa preservar la llingua asturiana.
Iniciativa pol Asturianu entamó una campaña en defensa de la oficialidá en diferentes puntos d’Asturies
La organización tuvo actos en Ciañu, Uviéu y Sotrondio en defensa de la oficialidá con un ésitu de públicu. Les charres teníen el títulu ¿Por qué ye necesaria la oficialidá del asturianu? Drechos llingüísticos n’Asturies» y aprovechose pa proyectar el documental «La vida ensin oficialidá. Les consecuencies de la falta drechos llingüísticos n’Asturies», fechu pola organización.
Inaciu Galán, presidente d’Iniciativa pol Asturianu, impartió les charres en Ciañu, Uviéu y Sotrondio onde dixo que «estos díes proyectamos esti documental nel qu’apaecen una montonera de casos de discriminación llingüística, pero por desgracia esta situación nun para. Esti messelmana denunciamos un nuevu casu qu’afecta a la Conseyería de Servicios Sociales pola publicación d’un documentu nel que s’esixía nun usar otra llingua que nun fuera el castellán. Esto nun puede siguir asina. Y esta situación nun va cambiar mientres los drechos llingüísticos nun tean recoyíos. La oficialidá ye la solución a esti tipu de discriminaciones» apuntó Galán.
Galán dixo amás que «los defensores del idioma y la oficialidá, que somos la mayoría de la sociedá, queremos que los nuesos drechos tean reconocíos nun estatus d’igualdá colos falantes de castellán. Los asturfalantes nun vamos contra nadie, cada día tenemos más sofitos, xenerando más consensu social que cada día va medrando al rodiu del nuesu patrimoniu llingüísticu».
El presidente d’Iniciativa pol Asturianu acabó diciendo que «tamos faciendo esta xira pa recordar que la oficialidá ye la ferramienta llegal pa igualar los drechos llingüísticos de los y les asturianes. Amás va ser una manera que mos va sirvir pa mantener vivu el patrimoniu llingüísticu d’Asturies. Y tamién porque va xenerar riqueza dinamizando la industria y la economía».
Galán aprovechó pa dicir que «la oficialidá del nuesu idioma ye una manera pa xenerar imaxe de marca p’Asturies, daqué que nestos momentos ye mui importante y mui interesante y la oficialidá va valir pa garantizar la igualdá y la llibertá pero tamién ye importante tener en cuenta que va atrayer consigo un crecimientu de l’autoestima colectiva que tanto precisa Asturies».
El presidente d’Iniciativa pol Asturianu dixo tamién que «ye amás una imaxe de marca p’Asturies a nivel comercial y turísiticu. Pa Iniciativa pol Asturianu, un patrimoniu cultural del altor d’un idioma ye un elementu clave pa dase a conocer nel mundu y ser atractivos al visitante».
Inaciu Galán dixo p’acabar que «tamos faciendo esta campaña pa demostrar con argumentos y rempuestes el motivu pol que la oficialidá ye llibertá y una forma de protexer un patrimoniu dando seguridá xurídica a les persones que quieren falar asturianu en diferentes ámbitos, nun hai nada más constitucional que facer cumplir precisamente la Constitución, que da un mandatu claru, les llingües sedrá oficiales». «Nun entendemos cómo dalgunos pueden presumir de defender la Constitución y al mesmu tiempu negar la puesta en práctica de la mesma».