Si preguntan por mí,
di-yos que me fui
a la gueta de lluz y resplandores.
Di-yos que me fui
que dexé la casa vacía d’ ilusiones.
Si preguntan por mí,
di-yos que me fui.
Que colgué nel percheru
temblores y desvelos,
y pesllé les ventanes del recuerdu.
Di-yos que me fui,
que dexé’l dolor zarráu
nel armariu del tiempu.
Si preguntan por mí
di-yos que me fui al país del silenciu,
a escaecer güelpes y desvelos,
a illuminar les tiniebles del iviernu.
Si preguntan por mí,
di-yos que llevo na maleta
delirios, y petites, y pasiones,
y desvelos, y emociones.
Si preguntan por mí,
di-yos que me fui a enterrar el mieu,
que me fui a la oriella’l mar
a escribir nel sable un cuentu.
Si preguntan por mí,
di-yos que me fui
hacia l’alba de los sueños.
Di-yos que me fui,
a la gueta l’amor,
a la gueta d’un cantar y d’un boleru.
Si preguntan por mí,
di-yos que me fui.
Soi collacia del vientu.