Marañueles lliteraries

Cuánto daría yo por unes marañueles
amasaes con versos
(de los tuyos),
de los que m’estremecen cuando los lleo.
Quiciabes seríen les marañueles más dulces del mundu.
Quiciabes envizcaríen a quien les probase,
porque tendríen como ingredientes:
metáfores d’amor,
hipérboles de deséu.
Quiciabes llevaríen forma de llira
o de cuartetu
o de romance
o de décima
o de sonetu.
Cuánto daría yo por amasar marañueles
de versos,
con formientu d’anáfores,
con sabor a sinestesia y a secretos.
Y dexales espillir a la calor d’un pariáu
y cocinales a la llume d’un hipérbaton.
Cuánto daría yo por saboriar
marañueles de versos
(de los tuyos),
de los que m’estremecen cuando los lleo.
Marañueles-caligrama
amasaes,
dibuxaes,
pintaes,
y cocinaes
con versos.