La Xunta d’Escritores Asturianos 2012 peslló’l pasáu llunes 5 de marzu na Biblioteca del Campu San Francisco d’Uviéu con una conferencia de D. Miguel Losada, director de la Sección de Cine del Atenéu de Madrid titulada «Cine y literatura, la traición necesaria».
Nel so discursu Miguel Losada analizó les estreches relaciones ente’l cine y la lliteratura a través de les películes de dellos directores-poetes y la vinculación poética y lliteraria esistente nes imáxenes y testos cinematográficos, afitándolo con abondes cites d’autores como Pasolini, Buñuel, Murnau o Visconti.
A continuación desarrollóse una Mesa Redonda sobre la Situación del cine n’Asturies, mesa formada por Sofía Menéndez, directora de Hi-Video Producciones; el productor Geno Cuesta de BlasterTV, el productor Juan Gona, Miguel Losada, y con Xavi Vilareyo, director del Festival de Cine Asturianu como moderador y organizador del debate. La Mesa Redonda analizó nun interesante alderique los problemes, perspectives y soluciones de futuru pa llograr que la industria del audiovisual n’Asturies consiga sobrevivir a les difíciles condiciones socioeconómiques y a un ambiente políticu y alministrativu foscu en xeneral pa cola industria asturiana del audiovisual.
La Mesa Redonda analizó abondos puntos concretos como la producción audiovisual n’Asturies, la situación en xeneral de les productores asturianes, la evolución del PIB audiovisual asturianu, les polítiques públiques del audiovisual desarrollaes n’Asturies, la financiación, los medios de comunicación y televisiones y la comercialización de productos audiovisuales. Los ponentes resaltaron la permala situación en xeneral del sector, la poca actividá de les asociaciones de productores asturianes, la necesidá de presionar más a los poderes públicos pa qu’entiendan los beneficios de tener empreses del audiovisual nel país como empreses de futuru pa la economía asturiana, asina como la denuncia de la política llevada alantre pol ente públicu de comunicación RTPA, calificando los ponentes la so actividá como nefasta pa la industria y pa los trabayadores asturianos dao que sólo un 1,5% del presupuestu d’esti ente públicu quedó en productores asturianes según recientes informaciones publicaes en prensa.
La Mesa Redonda analizó nun interesante alderique los problemes, perspectives y soluciones de futuru pa llograr que la industria del audiovisual n’Asturies consiga sobrevivir a les difíciles condiciones socioeconómiques y a un ambiente políticu y alministrativu foscu en xeneral pa cola industria asturiana del audiovisual.
La solución pal sector del cine asturianu en xeneral, según l’alderique col públicu asistente, pasaría por presionar más a los políticos pa que cambien la so mentalidá negativa hacia la industria asturiana del audiovisual, que nun se contraten a más empreses de fuera d’Asturies pa facer programes televisivos netamente asturianos, que s’arriesgue más el capital priváu pa invertir o los patrocinios pa obtener publicidá a través de películes y series. Tamién s’apuntó la idea d’intentar facer producciones lo más barates posibles p’aforrar en gastos de producción y evitar pérdides yá que ensin apoyos de tou tipu, la industria asturiana del cine y del audiovisual nun podrá non yá competir con otros territorios que sí apoyen la so industria (Andalucía, Cataluña…) sinón que les empreses asturianes nun podrán sobrevivir asina nin caltener puestos de trabayu n’Asturies, viéndose obligaes a pesllar, a marchar d’Asturies o a nun xenerar puestos de trabayu dientro d’Asturies. Sobre les instalaciones quedó claro que colos nuevos platós y estudios de Gona-Argame y Olloniegu hai infraestructura abondo pa rodar n’Asturies tou tipu de películes, documentales, series de televisión, sitcoms, teatru, programes diversos d’entretenimientu, magazines, docudrames… yá que si amás d’ello cuntamos col magníficu escenariu natural de la tierra asturiana podría dar como resultáu qu’Asturies sedría la tierra ideal pa facer cine yá qu’Asturies cuenta anguañu con abondos talentos y persones preparaes pa facer d’esta tierra un llugar importante pa la industria cinematográfica y audiovisual, un sector que xenera anguañu gran bayura económica y pesu específicu nes economíes de munchos países.