Iniciativa pol Asturianu, quixo vindicar, con motivu del Día de la Muyer, el papel de les escritores asturianes
A lo llargo de la hestoria éstes foren pegoyu fundamental, non solo por calterner l’idioma, sinón tamién por asitiar a la llingua asturiana como una de les llingües europees que tienen a más muyeres como referente creativu nel paradigma lliterariu. Amás, munches d’elles foren finxu, nel so momentu, de la escritura n’asturianu n’époques nes que nun yera fácil el so papel nel ámbitu les lletres.
D’esta mena, Iniciativa pol Asturianu recordó’l papel fundamental que xugaron pa la nuesa lliteratura dalgunes d’estes muyeres que formaron parte de movimientos lliterarios d’estremaes dómines, dende’l sieglu XVIII con Xosefa Xovellanos, hasta’l XX con Ánxeles López Cuesta, pasando por Enriqueta González Rubín, a quien debemos que l’asturianu seya la única llingua europea que tien por primer novelista a una muyer.
Delles, anguaño más escaecíes, préstanos que pasaren a tar presentes na memoria colectiva a l’altor que’l so valir artísticu merez. Convidámosvos a toes y toos a afondar na lliteratura d’estes grandes muyeres.
El plenu municipal de Xixón aprueba la Declaración Institucional en defensa de la Oficina de Normalización, del Plan de Normalización y la Ordenanza
La propuesta d’Iniciativa pol Asturianu contó colos sofitos de PSOE, Foro, Xixón Sí Puede, Izquierda Xunida y Ciudadanos.
Inaciu Galán, presidente d’Iniciativa pol Asturianu, intervino el 27 de febreru nel plenu municipal del Ayuntamientu de Xixón pa esponer les razones de la propuesta de Declaración Institucional en defensa de la Oficina de Normalización Llingüística y de la Ordenanza y el Plan de Normalización presentada por la ONX.
Galán dixo que “va unos meses pudimos sentir na prensa ataques que consideremos graves al llabor desarrolláu en Xixón nel ámbitu de la normalización llingüística. Y paecíanos importante qu’esti plenu reafirmara la so posición hestórica de sofitu institucional consensuáu a estes polítiques, coincidiendo especialmente colos primeros quince años de funcionamientu de la Oficina de Normalización Llingüística”.
El representante de l’asociación comentó que “pidimos a esti plenu que demuestre’l so compromisu col cumplimientu de la Ordenanza de Normalización. Y pidimos también esi mesmu sofitu al llabor de la Oficina de Normalización Llingüística y a los y les trabayadores de so. Porque vienen siendo una ferramienta necesaria y útil pa poner en marcha les midíes que señalen la Ordenanza y los planes”.
“Pidimos que se siga construyendo un clima de consensu y respetu al rodiu del idioma. Que se sigan llevando alantre les midíes acordaes y necesaries. Al nuesu paecer habría facese más rápido, anque reconocemos que, en xeneral, vienen dándose pasos alantre. Y nun se pue negar que fueron mui bien acoyíos pola sociedá xixonesa. La protección de les llingües d’España ye un consensu presente na sociedá y nes instituciones dende los tiempos de la Transición. Y nun ye namás una voluntá política d’un partíu o dellos, sinón que ye un mandatu constitucional”, añadió Inaciu Galán.
Inaciu Galán aclaró que “esta propuesta de declaración que facemos nun ye contra naide nin contra nengún grupu d’esta institución, sinón que quier precisamente sumar. Facemos un llamáu a tolos grupos políticos equí representaos pa dar güei un exemplu de consensu alredor d’un elementu patrimonial de la importancia d’un idioma y la cultura que lu acompaña”.
El presidente d’Iniciativa acabó diciendo que “tengamos una visión a llargu plazu, una visión xenerosa, trabayemos xuntos nesta defensa del patrimoniu cultural y llingüísticu de Xixón, d’Asturies, y tamién d’España, como lo ye del mundu, pa que nun se dea la situación na que tengamos de dar esplicaciones a los nuesos nietos cuando nos pregunten por qué nun ficimos dalgo cuando tovía se podía salvar l’asturianu.
Entrega de premios a los ganadores del concursu composiciones #LAMIOLLINGUAYE
El día 27 de febreru tuvo llugar, nel Conseyu de la Mocedá de Xixón, la entrega de premios a los ganadores del concursu composiciones #LAMIOLLINGUAYE, entamáu por Iniciativa pol Asturianu, con motivu del día de la llingua materna y desendolcáu nes redes sociales.
Los ganadores foron Alfredo Garay, Esther Maral y Gurriapu Andayón que tuvieron como premiu un llote llibros; de la mesma manera, fixóse mención a los alumnos y alumnes de 6u de primaria del colexu Cabueñes de Xixón que fixeron la lletra d’un cantar. Al endefechu, tamién, diéronse los premios a les menciones a Xose Inaciu, Ana López y Deiviz Xixón.