Iniciativa celebra’l resultáu electoral: “Podría permitir una reforma estatutaria cola oficialidá y vamos trabayar por ello”
El presidente d’Iniciativa pol Asturianu, Inaciu Galán, celebró los resultaos d’esta nueche “como un momentu hestóricu pol que se lleva trabayando más de cuatro décades de llabor pol asturianu”
Inaciu Galán, presidente d’Iniciativa pol Asturianu, esplicó esta nueche que’l resultáu de les elecciones autonómiques d’Asturies “permite falar d’un momentu hestóricu y confirma’l consensu social en favor de la oficialidá, yá que les fuercies que lleven la oficialidá nos sos programes electorales sumen 28 diputaos, si cuntamos a Foro, que falaba nel so programa d’esperar a un momentu de consensu, que consideramos que los resultaos d’esta nueche demuestren que yá ta equí, polo qu’hai que siguir trabayando en buscar un alcuerdu”.
“Los datos demuestren tamién que defender la oficialidá non solo nun supón una perda de votos pa los partíos que se sumen a ella, sinón que ye una midida mui bien recibida pola sociedá, como pue vese colos resultaos de la FSA-PSOE, que llevaba la oficialidá per primer vegada nel so programa y meyoró abondo los sos resultaos”, afirmó Inaciu Galán.
Pa la organización tamos énte un momentu de cambiu que podría permitir que se saque alantre una reforma estatutaria nesta próxima llexislatura. Galán esplicó que “vamos siguir trabayando pa sumar a otres formaciones al consensu pola oficialidá, porque esta ha ser una cuestión que mos axunte a tolos asturianos y asturianes alredor de los drechos llingüísticos y la conservación del patrimoniu cultural y llingüísticu d’Asturies, na izquierda y na drecha”.
“Pela nuesa parte, como organización civil, vamos tar faciendo’l llabor que mos correspuende, siguir afalando’l consensu y esixendo a los partíos que lleven la oficialidá nel programa que pongan en marcha les midíes necesaries pa facer la reforma efectiva de la forma más áxil que seya posible, asina como pa que, entrín y non, lleven alantre les midíes de normalización al altor de les circunstancies”.
Iniciativa pol Asturianu presenta quexes al Ministeriu de Fomentu y a Delegación de Gobiernu pola toponimia nes nueves señales de la ‘Y’ n’Avilés
La organización pide la correición d’esti error d’alcuerdu cola Llei d’Usu y los Decretos de toponimia
Iniciativa pol Asturianu presentó escritos al Ministeriu de Fomentu y a la Delegación del Gobiernu d’España n’Asturies dempués de comprobar les nueves señales colocaes nos accesos de l’autopista ‘Y’ n’Avilés. Los cartelos instalaos nun recueyen la toponimia oficial d’Uviéu y Xixón, apaeciendo únicamente la denominación en castellán.
Dende la organización pídese la corrección d’esti error acordies colo establecío na Llei d’Usu y Promoción del Asturianu de 3 de marzu de 1998, y d’alcuerdu col Decretu 105/2006, de 20 de septiembre, d’oficialización de la toponimia del conceyu de Xixón y d’alcuerdu col Decretu 14/2019, de 13 de marzo, d’oficialización de la toponimia del conceyu d’Uviéu.