Esti añu 2026 entama con una mui bona noticia: Iniciativa pol Asturianu vuelve a tener el so espaciu en Fusión Asturias. Con esta sección de noticies n’asturianu en Fusión Asturies queremos dar a conocer les noticies más interesantes del idioma.
Iniciativa pol Asturianu ye una asociación ensin porgüeyu económicu que nun recibe ayudes nin sovenciones públiques. Llevamos más d’una década trabayando pola normalización social de les nueses llingües y pol reconocimientu de los drechos llingüísticos de los sos falantes. Trabayamos p’algamar espacios de normalidá pa la llingua asturiana, al traviés d’acciones concretes que mos permitan llegar a alcuerdos con entidaes de toa triba que supongan afitar l’usu del asturianu n’ámbitos nuevos. D’igual manera, buscamos consensos y alcuerdos sobre l’usu del asturianu, faciendo usu de campañes reivindicatives nes situaciones nes que ye necesario.
Dientro d’esta prestosa web, abrimos esti espaciu dedicáu al idioma, un llugar onde la actualidá se xunta col compromisu col patrimoniu llingüístiicu d’Asturies. Nesta seición vamos recoyer noticies, actividaes y anuncies que tienen como oxetivu central la defensa, normalización y promoción del asturianu nos distintos ámbitos de la vida pública, siempres baxo una perspectiva de respetu, convivencia y alcuentru.
Iniciativa pol Asturianu ye una entidá activa y dinámica, presente nel debate social y institucional, que trabaya por garantizar los drechos llingüísticos de la ciudadanía y por dar visibilidá a una realidá cultural viva. Dende movilizaciones y campañes de sensibilización hasta propuestes polítiques y acciones educatives, esta sección va ser una ventana abierta a tol trabayu que se ta faciendo pola dignidá del nuesu patrimoniu llingüísticu.
Con esti espaciu, Fusión Asturias reafirma’l so compromisu con una Asturies plural, consciente de la so identidá y abierta al futuru, dando voz a iniciatives que defienden la cultura, la participación y la diversidá llingüística.
2025: Otru añu enllenu de bones noticies noticies pal idioma
Iniciativa pol Asturianu entamó nel comienzu d’esti 2026 la votación popular pa escoyer la ‘Meyor noticia pal asturianu en 2025’. D’esta manera, la organización llogró movilizar a la sociedá pa escoyer les meyores noticies pal idioma nel exerciciu fináu.
L’entamu del enseñu de forma reglada l’enseñu del asturianu y l’eonaviegu nel segundu ciclu d’Educación Infantil ye la Meyor Noticia pal Asturianu del añu 2025. Ye la opción más votada na consulta entamada por Iniciativa pol Asturianu. D’esta manera, la ciudadanía sofito de manera mayoritaria esti pasu alantre na inclusión de les llingües propies nesti tramu inicial de la educación. Esta noticia tien especial interés porque yera un tramu de la enseñanza na que l’asturianu entá nun taba presente. Tanto la Carta Europea de les Llingües como la propia Llei d’Usu y Promoción del Asturianu afalen n’implantar l’enseñu de les llingües propies en tolos niveles educativos. Amás, esta foi una reclamación constante d’Iniciativa pol Asturianu pa procurar la tresmisión xeneracional del idioma nesti primer contactu educativu.
Ente les siguientes noticies más votaes asitiáronse al empar l’enseñu del asturianu na Escuela Oficial d’Idiomes d’Uviéu y l’estrenu en TPA de L’abeya Maya, la serie de dibuxos animaos doblada al asturianu orientada al públicu infantil.
Otres noticies mui valoraes polos participantes fueron el sofitu mayoritariu de la Xunta Xeneral a la oficialidá del idioma recibiendo los votos de la mayoría absoluta de la cámara y la meyora del porcentaxe de matriculación na asignatura d’asturianu que medró un 34,2%.
Nesta edición volvió a ser un ésitu de participación durante los díes de votación. La organización propulsora de la votación agradez la collaboración y participación a tola ciudadanía que s’implicó na escoyeta popular que cumplió trece años de recoyer bones noticies pa la llingua asturiana asina como pa reconocer tolos pasos alantre na normalización del idioma.
III Congresu Internacional de la Llingua Asturiana: un espaciu pal estudiu científicu del asturianu
Iniciativa pol Asturianu convocó’l III Congresu Internacional de la Llingua Asturiana que se va celebrar en Madrid los prósimos 16 y 17 d’abril de 2026. Esti alcuentru que s’entama bianualmente (2022, 2024 y agora 2026) ta coordináu pol profesor Avelino Corral, Doctor nel Departamentu de Filología Inglesa de la Universidá Autónoma de Madrid, y collaboren Iniciativa pol Asturianu y l’Academia de la Llingua Asturiana. L’eventu pretende ser un altavoz pa la divulgación, estudiu y reflexón sobre la situación de la llingua asturiana. Al igual que la primer y segunda edición, celebraes nel 2022 y 2024 baxo’l títulu de ‘Distintividá, identidá y oficialidá’, repítese ubicación na Facultá de Filosofía y Lletres de la Universidá Autónoma de Madrid.
Les ponencies que se van presentar tan vinculaes a la llingua asturiana y pretenden ser analís o investigación relativo a cualesquier ámbitu del idioma (lliteratura, hestoria, llingüística, filolóxica, cultura…). Les esposiciones van facese desde l’ámbitu universitariu, asociativu o formativu. N’otres ediciones participaron representantes y espertes de les universidaes d’Uviéu, Ștefan cel Mare (Suceava), Vigo, Oklahoma State, California Riverside, Tennessee, Sussex, The City University of New York, París, Varsovia, Viena, Granada o Burgos.
