Otros Estatutos d’Autonomía

Equí van los testos cincantes al idioma propiu y la so oficialidá en delles autonomíes como son la gallega, la valenciana y les Islles Baleares. El primer d’ellos ye el que’l presidente d’Asturies quier tomar de modelu pa la futura reforma del Estatutu d’Autonomía. Los otros son modelos asemeyaos. Esperemos que seya ceo y s’actualice darréu l’artículu 4 del de nueso, que diría nesa llinia.
El tiempu pasa y la sustitución llingüística ta perdayuri. Pero inda hai enfotu na igualdá xurídica ente tolos idiomes del Estáu español. Nel Día d’Asturies, hai que lo recordar colos exemplos vinientes.

Estatutu Gallegu
Art.5

1. La llingua propia de Galicia ye’l gallegu.
   
2. Los idiomes gallegu y castellanu son oficiales en Galicia y toos tienen el drechu de conocelos y úsalos.
   
3. Los poderes públicos de Galicia garantizarán l’usu normal y oficial de los dos idiomes y potenciarán la utilización del gallegu en tolos órdenes de la vida pública, cultural ya informativa, y dispondrán los medios necesarios pa facilitar la so conocencia.
   
4. Nadie podrá ser discrimináu por razón de la llingua.

Estatutu Valencianu
Art. 6

1. La llingua propia de la Comunitat Valenciana ye’l valencianu*.
   
2. L’idioma valencianu ye l’oficial na Comunitat Valenciana, al igual que lo ye’l castellanu, que ye l’idioma oficial del Estáu. Toos tienen el drechu a conocelos y a usalos y a recibir l’enseñu del, y en, idioma valencianu.
   
3. La Generalitat garantizará l’usu normal y oficial de les dos llingües, y adoptará les midíes necesaries p’asegurar la so conocencia.
   
4. Nadie podrá ser discrimináu por razón de la so llingua.
   
5. Otorgaráse especial proteición y respetu a la recuperación del valencianu.
   
6. La llei establecerá los criterios d’aplicación de la llingua propia na Alministración y l’enseñu.
   
7. Llendaránse por llei los territorios nos que predomine l’usu d’una y otra llingua, asina como los que puean ser esceición del enseñu y del usu de la llingua propia de la Comunitat Valenciana.
   
8. L’Acadèmia Valenciana de la Llengua ye la institución normativa del idioma valencianu.

*Nota: valencianu y catalán son el mesmu idioma.

Estatutu de les Islles Baleares
Art. 4

1. La llingua catalana, propia de les Illes Balears, tendrá, xunto cola castellana, el calter d’idioma oficial.
   
2. Toos tienen el drechu de conócela y utilizala, y nadie podrá ser discrimináu por razón del idioma.
   
3. Les instituciones de les Illes Balears garantizarán l’usu normal y oficial de los dos idiomes, tomarán les midíes necesaries p’asegurar la so conocencia y crearán les condiciones que permitan aportar a la igualdá plena de les dos llingües no que cinca a los derechos de los ciudadanos de les Illes Balears.