Iniciativa pol Asturianu celebró’l Día de les Lletres Asturianes en Madrid

Iniciativa pol Asturianu
[Total:0    Promedio:0/5]

El sábadu 11 de xunu Iniciativa pol Asturianu recuperó la celebración del Día de les Lletres Asturianes en Madrid en collaboración col Centru Asturianu de Madrid. L’actu entamó coles pallabres de Valentín Martínez-Otero, presidente del Centru, que recordó’l sofitu de la entidá asturiana en Madrid a la cultura y la llingua asturiana y agradeció a Iniciativa pol Asturianu la convocatoria de la celebración.

Darréu, Marissa Bordallo, miembru d’Iniciativa pol Asturianu, presentó l’actu y agradeció al Centru la disposición pa entamar actividaes alredor de la llingua asturiana, presentándose darréu la revista Formientu énte les decenes de persones qu’acudieron a la celebración del eventu, que se retresmitía en directu al traviés de la canal de televisión Alderiques d’Asturies.

Darréu entamó la llectura de testos lliterarios n’homenaxe a la nuesa llingua y a los escritores qu’escriben n’ella per parte d’asturianos y asturianes residentes en Madrid, Un xestu d’homenaxe a la llingua asturiana nel que pudieron sentise versos y microrellatos d’autores como Rosa Cunqueira, Vanessa Gutiérrez, Iris Díaz Trancho, Xosé B. Álvarez, Héctor Pérez Iglesias, Antón García, Rubén García, Xurde Fernández, Henrique Facuriella y hasta un fragmentu de la traducción d’Asterix fecha por María Xosé Rodriguez.

Iniciativa pol AsturianuL’actu acabó con un alderique ente los presentes sobre’l presente y el futuru de la llingua asturiana, nel que se fixo por romper con dellos de los prexuicios sobre l’idioma instalaos en munches persones, asina como con unes pallabres d’Inaciu Galán, presidente d’Iniciativa pol Asturianu, nes que fixo un llamáu a “recuperar l’autoestima de los falantes, garantizar les midíes pa que la tresmisión xeneracional se produza”, recordando lo importante que ye cuntar con “respetu al idioma y reconocencia de los Drechos amparaos pola Constitución y la Declaración Universal de los Drechos Humanos”, lo qu’esplicó “pasa nel marcu actual pola declaración d’oficialidá pal idioma”.

DEJA UNA RESPUESTA

¡Por favor, introduce tu comentario!
Por favor, introduce tu nombre aquí