L’enseñu de la llingua asturiana vien siendo fonte de conflictos dende la Transición, cuando l’anguaño presidente Areces caminaba detrás de la pancarta de «Bable nes escueles» na primer manifestación de la dómina democrática. Colos estudios superiores los problemes xurdieron tamién pronto pola necesidá d’un profesoráu formáu pa les clases d’asturianu nos institutos y escueles.
La solución atopada entós, énte la negativa de Madrid a una Llicenciatura de Filoloxía Asturiana (magar del consensu total esistente n’Asturies), foi crear un Títulu Propiu, fuera de los estudios reglaos. Ñació como una solución temporal pero hasta agora nun pudo avanzase y l’adaptación de los estudios universitarios al Espaciu Européu d’Ensañanza Superior, conocíu popularmente como «Bolonia», garró al enseñu universitariu del asturianu col pie cambiáu.
Con namás un Títulu Propiu de la Universidá d’Uviéu yera impensable que s’aprobare un Grau de Llingua Asturiana (que nin siquier otres llingües, como’l gallegu, euskera, con una llarga tradición como llicenciatures consiguieron en munches universidaes) y el maior, como se vio, nun consiguió l’apoyu mayoritariu de la Xunta de Facultá y provocó un cisma en Filoloxía, cola dimisión de la Decana Ana Mª González Cano, tamién presidenta de l’Academia de la Llingua Asturiana. Viviéronse momentos difíciles nos que paecía que l’asturianu diba atopase fuera del enseñu regláu universitariu. Agora, col enseñu del asturianu solucionáu, ye’l momentu de siguir avazando na normalización de la llingua asturiana na Universidá d’Uviéu. El billingüismu corporativu, el reconocimiento del drechu al usu del asturianu, la promoción del idioma…
Sicasí, gracies a la xestión del nuevu Rector, Vicente Gotor, nomóse a un nuevu Decanu que supo facer por reconstruyir el consensu perdíu y facer una propuesta que traxo al asturianu, per primer vegada na hestoria, a los estudios reglaos y oficiales, con una mayoría a favor ablucante. Pero esto nun foi casualidá, el trabayu de dellos sectores asturianistes de la comunida universitaria, como’l Conceyu Universitariu pol Asturianu, tuvo muncho que ver nesti final positivu. Nós, dende’l CUPA, preferíemos que s’aprobare un «maior» d’asturianu, pero pensamos que les posiciones impacientes de dellos sectores namás podíen trayer pa la llingua d’Asturies un futuru nefastu, cola situación d’anguaño. Tamos seguros, agora, que col asturianu yá dientro de los estudios reglaos (¡cuidáu, a falta d’aprobase pol ENECA en Madrid!), el pasu a «maior», va venir pola propia demanda.
Agora, col enseñu del asturianu solucionáu, ye’l momentu de siguir avazando na normalización de la llingua asturiana na Universidá d’Uviéu. El billingüismu corporativu, el reconocimiento del drechu al usu del asturianu, la promoción del idioma… Unos pasos que’l nuevu Rector Vicente Gotor ta dispuestu a dar, como pudo vese yá nos discursos n’asturianu qu’echó (los primeros oficiales d’un Rector en 400 años), cola páxina web n’asturianu a piques de salir, o nel propiu apoyu al títulu oficial d’asturianu. Pero esti llabor precisa del trabayu y el consensu de toos a los que mos esmuel l’idioma d’Asturies dientro de la institución académica. Con responsabilidá tenemos de trabayar pa que los pasos vayan dándose y la Universidá d’Uviéu seya la vanguardia de la normalización social del asturianu.
Nesi llabor tamos dende’l Conceyu Universitariu pol Asturianu trabayando dende va dellos años. Somos una organización na que participen estudiantes, personal d’alministración y servicios… y que tien representación nel Claustru de la Universidá d’Uviéu, el máximu órganu de la institución. Convidamos a tolos miembros de la comunidá universitaria a xuntase a nós nesti llabor que tamos desenrollando al traviés de la busca de consensos y alcuerdos que lleven a la llingua d’Asturies a tener el llugar que merez na universidá d’Asturies. §
Inaciu Galán y González. Presidente del Conceyu Universitariu pol Asturianu (CUPA)
conceyuasturianu@gmail.com • https://asturies.gugara.com/cupa