¿Por qué ye necesaria la oficialidá del asturianu?

L’asturianu ta recoyíu como llingua protexida nel Estatutu d’Autonomía y tien una Llei d’Usu y Promoción. Ésta demostróse insuficiente, munchos ciudadanos nun ven amparaos los sos drechos civiles, pues na mayor parte los ámbitos oficiales tienen problemes pa usar l’asturianu.

Un 53% de los asturianos tán d’alcuerdu cola #oficialidá. Namás s’opón un 18%.
L’asturianu nun pue usase con total llibertá por tolos ciudadanos, produciéndose casos de discriminación cada día: nes escueles, nes alministraciones, nes empreses…
Como exemplu: la llider del PP d’Asturies, Mercedes Álvarez, felicitábase por consiguir que’l castellán fuera la única llingua del parllamentu asturianu, tres l’intentu d’usalu na actividá d’una comisión ¡sobre l’estudiu de la protección del asturianu!
L’asturianu tendría d’ufiertase en tolos niveles y etapes del sistema educativu pa que l’alumnáu pudiera escoyer. Nun ye asina, tolos años danse casos nos que s’impide l’accesu en centros públicos y concertaos. Amás nun ta presente en niveles como FP, Educación Infantil, Escueles Oficiales d’Idiomes…