Campamentu n’asturianu en Llión

Iniciativa pol Asturianu impulsa un campamentu col asturianu como protagonista.

La ONG Iniciativa pol Asturianu va poner en marcha esti mes de xunetu un campamentu de branu pa rapazos y rapaces de 6 a 16 años. El campamentu va celebrase del 8 al 15 de xunetu nel Albergue La Casona Amarilla, l’antigua residencia d’Hunosa en Villamanín, Llión. El campamentu organízase embaxo la xestión d’Abruja Ocio, con gran esperiencia na realización de campamentos dende va años y va cuntar con un equipu de monitores de calidá, falantes d’asturianu que van facer que toles actividaes d’ociu que van facese a lo llargo de los ocho díes d’esti primer campamentu n’asturianu, tengan por llingua vehicular l’asturianu.

Dende Iniciativ pol Asturianu valórase como una actividá de gran importancia pa collaborar na tresmisión xeneracional del idioma y pueden afirmar yá que ta siendo munches les persones que namás que s’anunció pidieron información y tán matriculando a los sos fíos, nesta nueva actividá que como toles organizaes dende Iniciativa pol Asturianu sosténense ensin ayudes públiques.

El campamentu va cuntar coles actividaes tradicionales de les acampaes pensaes pa la mocedá, como gymkhanes, xuegos na piscina, velaes nocheroregues, talleres… Pero amás, ésti va tener delles actividaes especiales venceyaes a la llingua y cultura asturianes, tales como talleres de xuegos y deportes tradicionales, talleres sobre la hestoria d’Asturies y una biblioteca de llibros pa rapazos n’asturianu del fondu de la Biblioteca d’Iniciativa pol Asturianu.

Otru de los puntos fuertes d’esti Campamentu n’asturianu ye la realización d’audiovisuales. Los neños van deprender los fundamentos básicos del trabayu audivosiual y van trabayar mano a mano con profesionales d’esti sector pa realizar proyectos de curtiumetraxes, videoclips y otres pieces d’esti tipu. Pa ello, van collaborar dende Cuatro Gotes Producciones, la plataforma de youtubers n’asturianu PlayPresta y la canal Alderiques d’Asturies.

El preciu del campamentu ye de 240 euros con too incluyío, con descuentu a 210 euros pal segundu hermanu o segundu campamentu del branu con Abruja Ocio. Pa más información ya inscripciones tán a disposición los teléfonos 647 583 859 y 622 044 703, amás del corréu [email protected]. La páxina web www.abrujaocio.com tamién cunta cola información del campamentu.