Los xestos (y los fechos) pa col asturianu

Imprimir E-mail
(1 Voto)
Escrito por Inaciu Galán, presidente d'Iniciativa pol Asturianu   
Viernes, 29 de Julio de 2016 08:32
Los xestos (y los fechos) pa col asturianu 5.0 out of 5 based on 1 votes.
Va unes selmanes volvió a declarase la oficialidá del asturianu en Bimenes. Cúmplense venti años de les declaraciones d'oficialidá que dellos conceyos asturianos fixeron en sofitu a la reclamación de que l'asturianu fuere llingua oficial nel Estatutu d'Autonomía, naquella llamentable reforma de 1998.
Aquelles declaraciones fueron un pasu hestóricu pero na mayor parte los casos quedaron nel xestu y echáronse de menos los fechos, les midíes que garantizaran que los Conceyos usen l'asturianu de forma tresversal y buscando les complicidaes de tolos sectores sociales de cada conceyu.
Declarar la oficialidá, o ser partidariu d'ella, como persona o como entidá, nun pue quedar nel xestu de declarase firme defensor y sofitar esi cambiu estatutariu, tien de significar más, tien que suponer fechos, fechos visibles nel día a día de les entidaes y les persones, que-y dean seguranza xurídica al falante y presencia pública al idioma.
Les formaciones polítiques que sofiten la oficialidá tienen de faela efectiva dientro de les sos organizaciones pa que la so reclamación resulte creyible, pa que pase del simple xestu col que se sofita una causa más. Cola nueva declaración d'oficialidá de Bimenes ábrese una oportunidá de faer les coses de nuevo y faeles entá meyor en tolos conceyos que nesti mandatu tienen mayoríes favoratibles a la oficialidá, pa pasar de los xestos a los fechos.



Bimenes declara la oficialidá del asturianuBimenes declara la oficialidá del asturianuEsti sábadu, 2 de xunetu la Casa Conceyu de Bimenes celebró un plenu hestóricu nel que por unanimidá de tolos grupos políticos declaróse la oficialidá del asturianu nes llendes de Bimenes. Ye la segunda vegada que se declara la oficial a la llingua asturiana. La primera, en 1997, acabó cola derogación de la oficialidá per parte de los tribunales, tres la presentación d'una demanda per parte del Gobiernu d'España.
Cientos de vecinos, persones llegaes d'otros conceyos, representantes políticos y de la vida cultural y social d'Asturies, ente los que taba un grupu de miembros y representantes d'Iniciativa pol Asturianu, asistieron a esti actu y celebraron darréu la proclamación del asturianu como llingua oficial en Bimenes. Alderiques d'Asturies ufrió la señal en directu y grabó un programa especial.

L'asturianu ye exemplu n'EuropaL'asturianu ye exemplu n'EuropaIniciativa pol Asturianu participó nun alcuentru européu dedicáu a compartir actividaes entamaes por entidaes en defensa y promoción de llingües europees amenzaes. L'alcuentru, que se fixo dientro de los actos de Donostia, capital europea de la cultura 2016 y axuntó a decenes d'entidaes de toa Europa n'Hernani embaxo'l nome "Hitzargiak-Llingües que s'allumen unes a otres".
Inaciu Galán, presidente d'Iniciativa pol Asturianu, foi'l responsable de presentar los proyectos calificaos como "bona práctica llingüística" pol comité del alcuentru européu dientro de la mesa redonda "Medios de comunicación, ayudantes na construcción de sociedaes multillingües".
Una mesa na que Galán presentó la situación del asturianu y los proyectos nos que ta implicada Iniciativa pol Asturianu: el so programa de radio Iniciativa pol Asturianu nes ondes, dirixíu por Samuel Gradín, y el proyectu Alderiques d'Asturies, que se realiza en collaboración con Gomeru Producciones y ye la primera canal de televisión 100% n'asturianu.
scroll back to top
 

Directorio de empresas

silvota_trabajador

Directorio de  Guía de Asturias

Números publicados

portadas

Concejos

mapa_asturias_p