Los xestos (y los fechos) pa col asturianu

Va unes selmanes volvió a declarase la oficialidá del asturianu en Bimenes. Cúmplense venti años de les declaraciones d’oficialidá que dellos conceyos asturianos fixeron en sofitu a la reclamación de que l’asturianu fuere llingua oficial nel Estatutu d’Autonomía, naquella llamentable reforma de 1998.
Aquelles declaraciones fueron un pasu hestóricu pero na mayor parte los casos quedaron nel xestu y echáronse de menos los fechos, les midíes que garantizaran que los Conceyos usen l’asturianu de forma tresversal y buscando les complicidaes de tolos sectores sociales de cada conceyu.
Declarar la oficialidá, o ser partidariu d’ella, como persona o como entidá, nun pue quedar nel xestu de declarase firme defensor y sofitar esi cambiu estatutariu, tien de significar más, tien que suponer fechos, fechos visibles nel día a día de les entidaes y les persones, que-y dean seguranza xurídica al falante y presencia pública al idioma.
Les formaciones polítiques que sofiten la oficialidá tienen de faela efectiva dientro de les sos organizaciones pa que la so reclamación resulte creyible, pa que pase del simple xestu col que se sofita una causa más. Cola nueva declaración d’oficialidá de Bimenes ábrese una oportunidá de faer les coses de nuevo y faeles entá meyor en tolos conceyos que nesti mandatu tienen mayoríes favoratibles a la oficialidá, pa pasar de los xestos a los fechos.