Iniciativa pol Asturianu celebró’l so II Seminariu: ‘Oficialidá: el camín constitucional de futuru pal asturianu. Reflexones y casos d’ésitu’

0
71
Iniciativa pol Asturianu
Iniciativa pol Asturianu
[Total:0    Promedio:0/5]

El Rector de la Universidá d’Uviéu, Santiago García Granda, recordó na inauguración que “la llingua ye la manifestación viva del tiempu que vivimos y ye la nuestra obligación tresmitila a les xeneraciones venideres”.

La primer xornada del II Seminariu entamáu por Iniciativa pol Asturianu baxo’l títulu “Oficialidá, el camín constitucional de futuru pal asturianu” cuntó cola presencia del Rector de la Universidá d’Uviéu, Santiago García Granda, qu’abrió l’acuentru recordando que “la llingua ye la manifestación viva del tiempu que vivimos y ye la nuestra obligación tresmitila a les xeneraciones venideres”.
Inaciu Galán, presidente d’Iniciativa pol Asturianu, dixo nel so discursu inaugural que “queremos quitar mieos y dar informaciones veraces sobre el valir de la oficialidá. Porque la oficialidá nun ye más qu’aplicar la Constitución. Tenemos que consiguir que tolos españoles quieran la nuesa llingua porque la única forma de que l’asturianu sobreviva ye que se cumpla l’artículu 3.2 de la Constitución”.
Esta xornada valió pa facer una valoración de cómo la llingua asturiana puede ser un elementu de creación de riqueza, d’empreses y d’empléu. Tamién presentóse’l documental “El valir económicu d’una llingua” nel qu’economistes y empresarios de diferentes sectores amuesen cómo la utilización del asturianu val pa ufiertar un productu diferenciáu y con un valor añadíu. Amás dempués de la presentación Xicu Mata, Susana Sela y Lluís Fanjul ficieron un repás a les posibilidaes que tien la llingua asturiana dientro d’un idioma.
Previamente a ello, Antonio Trevín Lombán (ex presidente del Gobiernu d’Asturies), Victoria Rodríguez Escudero (ex conseyera de Cultura del Gobiernu d’Asturies por el PP), Francisco Javier García Valledor (ex conseyeru de Xusticia, Seguridá Pública y Rellaciones Esteriores por IX) y José Suárez Arias-Cachero (ex miembru del Conseyu d’Alministración de RTPA por FORO y ex conceyal de Cultura n’Uviéu por el PP) participaron nun interesante alderique sobre la política lingüística y la oficialidá. Na mesa, Trevín fizo un apueste por un modelu de cooficialidá propiu p’Asturies apuntando que “la falta d’oficialidá ye un problema colectivu d’identidá”. Victoria Rodríguez Escudero recordó que l’aprobación de la Llei d’Usu nun foi fácil. Ye una pena que nun se desendolcara” y apuntó tamién que “gustaríame que’l nuestru modelu d’oficialidá seya un modelu respetuosu, ensin imposiciones”. Valledor comentó que “l’asturianu politizóse polos que nun queríen la oficialidá” y Arias-Cachero aprovechó la mesa redonda pa reclamar la reconocencia oficial del asturianu manifestando que “oficialidá amable, asturiana… como quieran llamala, ye la única opción”.
Leopoldo Tolivar Alas, calderalgu de Drechu Alministrativu de la Universidá d’Uviéu, echó el pieslle a la xornada con una conferencia con el nome de “L’asturianu nel marcu constitucional: ¿Por qué fai falta la oficialidá?” onde comentó que “agora que tamos a les puertes d’unes elecciones la falta d’oficialidá torga que les papeletes puedan, por exemplu, dir en billingüe”. El calderalgu comentó tamién que “tamos nel furgón de cola en derechos llingüísticos” y añadió que “esisten casos n’Europa onde sin haber oficialidá la enseñanza primaria ye por llei na llingua materna”.
El sábadu 18 foi la segunda xornada del seminariu que celebróse nel Aula Magna del Edificiu Hestóricu de la Universidá d’Uviéu. El día entamó con una mesa redonda con diferentes responsables de normalización llingüística nos conceyos. Tuvieron presentes Montserrat Machicado (Avilés), Penélope Miranda (L.lena) y Andrea González (Ozcos-Eo). Nesti alderique, Penélope Miranda del Servicu de Normalización de L.lena recordó “tamos llevando l’asturianu al ámbitu local”. Pela so parte, Machicado dixo que “la oficialidá ye mui necesaria pa facilitar el trabayu internu n’alministración de los Servicios de Normalización Llingüística”.
Andrea González comentó que “naide incumple outro tipo de leis, la toponimia sí” y sentenció diciendo que “el futuro das nosas llinguas si non hai oficialidá é mui mouro”.

DEJA UNA RESPUESTA

¡Por favor, introduce tu comentario!
Por favor, introduce tu nombre aquí