Europa torna a dividise en cuenta de ser una sola voz pola mor de les centrales nucleares. Hai estaos que nun tienen como Portugal o que les pesllaron toes como Alemaña. Otros tienen delles (7) como España, que va dexales cuando finen la so vida útil. Y dalgún otru que nun solo tien bayura, como Francia (58) sinón que quieren facer delles más (6).
Cola cris enerxética y la guerra n’Ucraína, vieno la inflación y el focu nes enerxíes anovables. Pero nun paréntesis na so hestoria, inclusive la Xunión Europea declaró la enerxía nuclear como enerxía verde. Daqué insostenible dafechu. Les centrales nucleares son mui peligroses, ye enerxía sucia, xenera pocu emplegu, ye mui cara, nun ye necesaria, nun son la igua del cambéu climáticu, también s’agota, nun tiene sofitu social y contribúi al armamentismu nuclear. Quita grandes recursos escontra’l cambéu climáticu. Coles foles de calor, cada vegada más frecuentes, hai que les apagar. Les sos borrafes siguen radioactives demientres cientos de miles d’años, y los accidentes desanicien rexones enteres. La estratexa que diba empobinar a la XE a ser el primer territoriu con emisiones netes cero nel 2050, xiró al reclasificar la enerxía nuclear.
Les centrales nucleares son mui peligroses, ye enerxía sucia, xenera pocu emplegu, ye mui cara, nun ye necesaria, nun son la igua del cambéu climáticu, también s’agota, nun tiene sofitu social y contribúi al armamentismu nuclear.
La polarización divide agora Europa, na que dellos estaos faen un apueste por inaugurar nueves centrales nucleares pa producir más lletricidá. Sondeos paneuropeos afiten que daneses, alemanes ya italianos son esceuticos na tema, mientres que belgues y españoles siguen a Alemaña, y polacos, neerlandeses y fineses tiren por esa fonte enerxética potencialmente tan perxudicial.
Chernóbil o Fukushima son exemplos de lo que nun pue pasar na XE. Nel intre nel que ta a la gueta de la neutralidá enerxética y la llucha escontra’l cambéu climáticu. Amás, les nueves cadarmes nucleares precisen d’unes inversiones que se resten del fomentu de les enerxíes llimpies de la transición verde entamada de recién.
Si Europa quier ser nun futuru una auténtica federación d’estaos, ha caltener una mesma llinia pa tolos sos miembros.
Agora, esa idega amuesa gran debilidá, al dexar que cada estáu faiga lo que-y pete nesta tema tan importante. Otra vuelta, Europa ta dividida, agora poles centrales nucleares. Mientres, otres potencies miren esti fechu con bonos güeyos.
Mentanto, l’asociación de los sobrevivientes xaponeses del bombardéu nuclear d’EE.XX. na II Guerra Mundial recibíen el premiu Nobel de la Paz 2024, porque’l so movimientu pacifista pide la retirada de toles bombes atómiques…