Asturies ye un pueblu únicu, en víes d’autorreconocese como talu. Magar que de tolos elementos identitarios que tien, les sos llingües son les menos valoraes por dellos seutores sociales, mui cómodos col castellanu obligatoriu al ser entá l’únicu idioma oficial del país.
De Xovellanos a l’ALLA, son grandes los nomes de la so hestoria, que puxaron pol caltenimientu y vitalidá del asturianu.
Pero dellos partíos políticos apararon, y aparen entá, el desendolcu normal del idioma, a la escontra de lo que ficieron n’otres comunidaes tan averaes como Galicia.
La llingua autóctona ye’l marcador cultural d’una patria querida por toos, pero inorada nesa parte cimera por dalgunos.
Esos qu’aceuten la oficialidá del eusquera, el gallegu y el catalán pero non la d’esta patria asturiana, que nun deben querer tanto.
Prefieren que tea muda la so llingua milenaria a que, llibremente, espoxigue como les demás del Estáu español.
A la llarga, van faer un problema onde nun lo tien d’haber.
La convivencia ente los falantes ye la guía del movimientu de recuperación llingüística dende va más de mediu sieglu.
A caún lo de so y toos contentos.
Pero al metese cola espresión del pueblu, xeneren un refugu nél. N’otros llugares llámenlo desafeición.
Equí nun tiene por qué pasar, si abren les puertes de vetos y censures, de desigualdaes y discriminaciones.
Asturies ye un pueblu singular. Una patria querida por munchos.
Que naide nun va ser quien a ver callada la so voz.