La llibertá de prensa énte la cris ambiental mundial ye una tema d’interés pa les Naciones Xuníes.
La concienciación sobre les crisis ambientales ye clave pal sofitu de les democracies nes que’l periodismu tien un papel cimeru.
La triple cris mundial: cambéu climáticu, perda de la biodiversidá y contaminación atmosférica, carez campañes de desinformación que dubien de la investigación de los científicos nesi sen.
La ONX afita una estratexa que promueva la pluralidá, diversidá y viabilidá de los medios de comunicación. Que prevenga y protexa a los periodistes. Que garantice los drechos a la llibertá d’espresión, d’investigación científica y l’accesu a les fontes d’información. Qu’argumente la seguridá de les plataformes dixitales acordies colos estándares internacionales de drechos humanos nel sen indicáu pola UNESCO.
Hai de cellebrar los principios de la llibertá de prensa, evaluar la situación de so nel mundiu, defender los medios de comunicación na so independencia y homenaxar a los periodistes finaos nel cumplimientu del so deber.
La UNESCO ye’l muérganu de la ONX que s’enfota na llibre circulación d’idegues per aciu de la pallabra y la imaxe. Poro, puxa polos medios independientes y plurales en cualesquier plataforma o formatu. Porque’l so desendolcu favorez la llibertá d’espresión y refuercia la paz, el desendolcu caltenible, los drechos humanos y la llucha escontra la probitú.
D’esta miente, el Premiu Mundial de la Llibertá de Prensa UNESCO surde como homenaxe a un periodista colombianu asesináu énte les oficines del so periódicu en Bogotá, nel añu 1986.
Anguaño asistimos al asesinatu de munchos periodistes nes fasteres en conflictos bélicos. Pero esta llamentable violación del drechu internacional nun pue parar el drechu a la información llibre de los ciudadanos, pa la comprendoria veraz de lo qu’acaez nel planeta acaldía.
Sobre manera nun asuntu de tanta trascendencia como’l cambéu climáticu y los temes arreyaos a la salú mundial.