La importancia de les tradiciones invócase munches vegaes como argumentu falsu pa tapecer les tradiciones de siempre.
Esti ye’l casu de la Feria d’abril y los toros, ayenes dafechu a les costumes del pueblu asturianu. En dellos conceyos, cola escusa de ser una moda española, llántense dende los gobiernos llocales estes actividaes d’aculturación, pola vía’l decretu. Enxamás pol consensu.
Nun tienen tantes prieses n’allugar la llingua asturiana, por exemplu, nos llugares nos que seya más visible. Nos que sirva d’encontu a la so normalización social dempués de tantu tiempo de maltratu.
L’enfotu na uniformidá de los pueblos del Estáu quier frayar l’esquema de les autonomíes, como víes intermedies a un posible federalismu onde les cultures propies seyan respetaes.
Les tradiciones son les que son. Non les imposiciones inventaes col envís de camudar una cosa n’otra.
L’Estáu democráticu tiene les sos nacionalidaes, nes qu’habría tar Asturies. Coles sos diferencies, dientro d’un marcu común estatal y européu.
Siguir aporfiando en tresplantar los tópicos españolistes a toles partes, inclusive aquelles nes que nun son tradición ye un erru qu’afonda na incomprensión de la pluralidá cultural d’España.
Esti ye’l periodu más llargu na estabilidá política de la hestoria, y de xuru qu’almitir esa diversidá nes cultures y les llingües, na constitución de 1978 xugó un papel cimeru.
Les tradiciones son les que son. Non les imposiciones inventaes col envís de camudar una cosa n’otra.
Mientres, les auténtiques tradiciones sobreviven en demasiaes ocasiones gracies al voluntarismu de quien resiste la fola política d’anguaño. La que nun ve na llibertá de costumes un bien común, como afitara Xovellanos.