ACNUR, l’Axencia de la ONX pa los refuxaos sopelexa que más de 60 millones de muyeres y neñes refuxaes foron forciaes a fuxir y entamar una vida nueva. Afiten que finar cola violencia de xéneru ye cosa de toos. Son más del 50% de los desplazaos nel mundiu. Y les más vulnerables. El 70% de les muyeres en conflictos, guerres y crisis humanitaries cadecen violencia de xéneru, munches vegaes como un arma común.
Afganistán ye’l peor llugar pa ser muyer. Los talibanes esborraron la so independencia personal y económica.
Foron el 77% de les persones que necesitaron aidanza humanitaria nel 2024 nesi Estáu, que ye’l de mayor violación de drechos humanos de les muyeres y s’asitia ente los diez con menos IDH, Índiz de Desendolcu Humanu. Paez qu’elles nun formen parte de la sociedá.
Otres aiciones acaecen n’El Líbanu, na República Centruafricana, en Ruanda, Zimbabue y Nixeria, ente otros países.
ACNUR sofita que la educación aporte a les muyeres otra vegada como preséu de tresformación social.
Fechos de cotidián son prohibíos pa les afganes, pola fuercia exercida escontra elles nun mundiu d’homes.
Dende Europa y otros llugares nos que la equidá ye un oxetivu públicu, hai d’exercer una aición solidaria pa sacales del infiernu nel que viven.
L’abandonu per parte de los EE.XX. de munches de les instituciones internacionales nun fai otro qu’afondar el problema de la discriminación oficial haza les muyeres nesti y n’otros estaos.
Anubrir esi espaciu valeru ye xera de toos, porque toos y toes somos iguales no cincante a los drechos humanos.
