No cincante a la llectura y la escritura, les muyeres, que tuvieron llargu tiempu per detrás, son agora los axentes mayoritarios. Poro, dende 2016, el llunes más averáu al 15 d’ochobre, aniversariu del finar de Teresa de Xesús, cellébrase’l Día de les Escritores.
Entamaron la data la Biblioteca Nacional d’España, FEDEPE y l’Asociación Clásicas y Modernas.
Venceyaes a Asturies homenaxóse a Rosario d’Acuña y Dolores Medio.
La idea ye vindicar el llabor lliterariu de tantes muyeres que quedaren nun segundu planu na Hestoria nun actu de xusticia y reconocencia haza elles.
Faise al traviés d’un tema añal, per aciu’l que se faen llectures d’obres, participación n’eventos lliterarios, discutinios nes redes sociales, sofitu a escritores contemporánees, educación y sensibilización sobre les muyeres y les sos obres. Non solo ye un sofitu a la lliteratura femenina sinón un averamientu a la igualdá de xéneros.
Dende Xosefa Xovellanos, primer escritora n’asturianu y Enriqueta González Rubín, autora de la primer novela n’asturianu en 1875, pasando por Eva González o María Teresa González, a Pilar Sánchez Vicente, Ángeles Caso o Lourdes Álvarez, rexístrense al rodiu de cien autores asturianes que faen lliteratura en xeneral y otru cientu na nuesa llingua.
Elles tienen amás un mayor compromisu llingüísticu qu’ellos, según un estudiu de Xuan Santori.
Son mayoría nos índices y talleres de llectura y d’escritura, poro, tamién son acaldía más importantes nel llistáu d’escritores.