Día de la Sidra n’Escalante (Asturies de Tresmiera)

Tuvo llugar el pasáu día 31 de xunetu nel pueblu tresmeranu d’Escalante el 11u Día de la Sidra, entamáu pola Asociación Pomolóxica d’Escalante. Abonda xente acudió un añu más a esta histórica localidá d’Asturies de Tresmiera atrayíos pol lema de la fiesta: “Compra un vasu sidra y bebi cuanto puedas”.
La fiesta entamó a les 12 hores cola presentación y actuación del Coru Virxen de la Cama. Llueu del escanciáu del primer “Culín d’Honor” entamó la degustación pa tol públicu na plaza principal onde s’alcuentra la Casa Conceyu d’Escalante. A les 14 hores pesllaron los puestos d’escanciáu pa dar pasu a les diferentes xintes organizaes per tolos chigres y restoranes de la localidá. El bon tiempu sofitó un guapu día pa xintar albentestate. A les 17 hores entamó un espectáculu infantil de música y teatru nel escenariu principal cola actuación del grupu Virigaña. Y a les 19 hores volvió entamar la degustación de tola sidra espuesto hasta que nun quede nin una pingarata. Les actuaciones musicales con música de la rexón y música caribeña dieron-y pieslle a una xornada completa dedicada dafechu a la bebida nacional de les Asturies: la sidra.
Escalante alcuéntrase na ribera d’una amplia ría onde tán les marismes de Santoña. Esta villa conocíase dende antiguo como El Puertu (Portus Victoria) siendo un importante cai yá dende época romana. Les tradiciones asturianes paez que renacen n’Escalante a través de la sidra, dende hai once años, cola adopción de tol ritual cultural de tipu asturianu.”Nel sieglu VIII toa Tresmiera pertenez al Reinu d’Asturies y nesta época fúndase’l Monasteriu de Santa María del Puertu que va ser l’orixe d’una capitalidá política y eclesiástica nesta Asturies de Tresmiera. El Cartulariu d’esti monasteriu fai abondes menciones a los reis d’Asturies y nél fálase de la esistencia n’Escalante d’otru monasteriu. Tresmiera pertenecía al obispáu asturianu de Valpuesta pero llueu de l’apropiación polos condes de Castiella y la posterior anexión al Reinu de Pamplona en 1035 fai que toa Asturies de Tresmiera pase a pertenecer al obispáu de Náxera mentantu que les Asturies de Santiyana siguen perteneciendo al obispáu d’Uviéu. Nel sieglu XIII el señoríu d’Escalante pertenecía a Diego López de Haro, Señor de Bizcaya, qu’edifica un castiellu en Montefanu pa protexer Escalante. En 1346 los señores de Haro conceden una carta puebla a Escalante comprometiéndose a defendela y respetar los sos usos. Nel sieglu XV el señoríu d’Escalante pasó pa los Ladrón de Guevara y contra ellos pleitearán los vecinos pa llibrase del señoríu y asina pertenecer a la Merindá civil d’Asturies de Tresmiera. Créese que la nau Santa María construyóse nos astilleros d’Escalante. Munchos vecinos d’esti pueblu ficieron les amériques, ente ellos misioneros, y por ello hai tantos llugares n’América que lleven el nome d’Escalante.
Escalante destaca pola so arquitectura tradicional, una de les principales casones ye güei la Casa Conceyu, y tamién pola so robusta ilesia barroca, pola ermita románica de San Román y polos conventos de San Sebastián y San Xuan onde s’alcuentra la Virxen de la Cama que fai fiesta’l 22 d’agostu.
Les tradiciones asturianes paez que renacen n’Escalante a través de la sidra, dende hai once años, cola adopción de tol ritual cultural de tipu asturianu: dende’l vasu de sidra, hasta la forma les botielles, típicamente asturiano too y tamién l’escanciáu a l’asturiana, el chorizu a la sidra, el xuegu la xaronca y hasta’l vocabulariu asturianu, intentando asina alitar toa una nueva industria a través d’esta bebida.
Nesti 11u Día de la Sidra n’Escalante participaron un total de 26 llagares, la mayoría d’ellos d’Asturies d’Uviéu (Castiellu de Bernueces, Buznego, Cabañón, Cabueñes, Castañón, Estrada, Fanjul, L’Argayón, Menéndez) y tamién d’Asturies de Santiyana (El Muro, Las Anxanas, Somarroza, Ti Sidru) y d’Asturies de Tresmiera (Ciscaju, El Diezmo, La Escalantina, Villa de Escalante, Virgen de la Cama), amás participaron otros llagares sidreros de Galicia, Guipuzcua y Bretaña. La fiesta foi tou un éxitu d’asistencia.