Asturies remembra nesti añu los once sieglos de la muerte d’Alfonsu III el Grande, ún de los reis más importantes d’Asturies y del que conservamos el so escudu y seña real, la nuesa bandera asturiana.
Governó Asturies per 45 llargos años (866-910) algamando’l Reinu asturianu la so máxima estensión territorial: dende’l ríu Mondego hasta Guipuzcua.
Alfonsu III afita les fronteres del reinu venciendo dos veces a los bascones, afirmando’l so dominiu nel oriente alabés y bizcaínu. Funda Burgos y Castroxeriz, creando una rede de castiellos defensivos nesa fastera onde yeren frecuentes los ataques moros. Nel occidente avanza pel sur conquistanto Portu y Chaves, repoblando toa esa zona ente’l Miñu y el Dueru, onde fai resurdir ciudaes como Braga, Ourense, Cuímbra, Viséu y Lamego. Fortalez la frontera sur del ríu Dueru repoblando Zamora, Simancas, Dueñas y Toru, plaza encomendada al príncipe García, col que depués mantendrá ciertu enfrentamientu que llevarán al príncipe a sufrir prisión nel castiellu de Gauzón por rebeldía. El Reinu asturianu taba alministrativamente dividíu en provincies o “condaos” que nun yeren hereditarios sinón nomaos por decisión del rei que podía nomalos o deponelos al so criteriu.
Anguañu conservamos el nome del so reinu, Asturies, y los sos símbolos: la cruz de Pelayu orniada n’oru coles lletres alfa y ómicra, y abondos edificios civiles y relixosos.Hacia 881 entra n’Hespaña per Lusitania llegando cuasi hasta Mérida, tornando a Uviéu victoriosu. Uviéu vuelve ser centru difusor de la renacencia cultural del Estáu asturianu. Na capital reedifica los palacios ya ilesies reales como la de Santuyanu, fai ilesies en Tuñón, Valdediós, y amplia la basílica de Santiagu que yá ficiera Alfonsu II sobre la supuesta tumba l’apóstol por esti rei descubierta. Pa complacer y controlar a la nobleza galaica, Alfonsu III manda pa Compostela al so fíu, el príncipe Ordoñu, como conde governador de Galicia nes tierres al otru llau del ríu Eo. Adorna la cruz de Pelayu con oru y piedres como seña y símbolu del Reinu d’Asturies que yera, donándola a la ilesia d’Uviéu nel 908. Entama la publicación de la Historia d’Asturies, una gran obra historiográfica cola redacción de la Crónica oficial del Reinu, que supón toa una consolidación y culminación del procesu de desarrollu cultural, territorial y políticu del Reinu d’Asturies. Los continuos triunfos militares d’Alfonsu, nomáu por ello “el Grande” y la decadencia interna cordobesa fai suponer a los cristianos del sur que’l rei asturianu pueda conquistar toa Alándalus. Asina, ellabórase una ideoloxía política imperial, al pretender Asturies dominar territorios al sur del Dueru, que nunca pertenecieron a los ástures, mediante la tesis del neogoticismu, pretendiendo Alfonsu siacasu ser emperador d’Hispania, idea que’l Emiratu de Córdoba tarrecía.
Anguañu conservamos el nome del so reinu, Asturies, y los sos símbolos: la cruz de Pelayu orniada n’oru coles lletres alfa y ómicra, y abondos edificios civiles y relixosos.
Alfonsu III muerre en Zamora en 910, llevándose’l so cuerpu pa Uviéu, pal panteón real de la capiella de Santa María, llindante cola catedral.
Darréu d’ello, nesi mesmu añu 910, el so fíu Fruela II proclámase n’Uviéu sucediéndolu llueu de la so muerte como nuevu rei d’Asturies. Na so proclamación Fruela II y la reina Nunilo regalen a la ilesia d’Uviéu la Caxa de les Ágates que lleva grabada en plata la Cruz de la Victoria d’Asturies.
1100 años ensin Alfonsu III el Grande
