La situación del cine n’Asturies

La Filmoteca d’Asturies, creada por Sergio Marqués, padez un incomprensible despreciu polos goviernos socialistes posteriores. El fracasu de la Film Comission parez que foi un fracasu de xestión política del que naide dio o pidió razones. La interesante Productora Pública, si esiste, parez que duerme nun eternu pigazu. Tantos años pidiendo una TV pública asturiana pa ver con vergoña que dende que se creo foi ñeru d’escándalos económicos, contables, organizativos, llaborales, llingüísticos… que dan pena y que sólo sirve pa enriquecer y mantener a personaxes afines a los partíos governantes y que foi incapaz de producir una sola película o serie propia, que se ñega a emitir películes o series doblaes al asturianu, que reprime y ridiculiza la llingua asturiana afondando na diglosia despectiva y qu’amás alimenta empreses que nun són d’Asturies. El pieslle d’importantes empreses productores asturianes enllaza cola situación de los estudios de Morcín y la paralización de proyectos n’Olloniegu. Na Universidá nun hai posibilidá d’estudiar cine. Ello contrasta col éxitu que munchos asturianos tienen na emigración. La política asturiana d’ayudes o suvenciones consistió en financiar xenerosamente a directores y actores famosos estranxeros yá de por sí multimillonarios y pol contrario racanear con probes migayes a los nuevos y pervaliosos realizadores asturianos. Nun se trata de pidir más dineru públicu, trátase de que lo poco qu’haya tea bien repartío ente los propios asturianos y nun sirva pa engordar productos o empreses de fuera. Trátase de fomentar, apoyar, nun poner tranques. El problema principal ye qu’a pesar de tener instituciones propies asturianes éstes nunca consideraron al cine como industria, el fin de la Conseyería de Cultura nunca foi apoyar la producción cultural de los asturianos sinón otros fines políticos y de control. Edificaron carísimos contenedores pero vacíos de conteníu. El dineru de los asturianos tien que servir p’ayudar a los emprendedores asturianos y non pa financiar proyectos de fuera. Si nun ye asina ¿Pa qué queremos una Autonomía asturiana que dilapida los nuestros dineros pa entregalo a intereses de fuera d’Asturies? ¿Pa qué sirve una TV asturiana que sólo paga empreses de Madrid o Hollywood? Estes custiones simples ye difícil que les entiendan políticos asturianos, por ello tenemos qu’apelar a los votantes pa que censuren y critiquen los comportamientos antiasturianos de los políticos que voten. O que se vote a otros nuevos que faigan una política diferente, favorable a los intereses asturianos.
 Llueu de tantos años de debatir estos problemes n’Asturies llegóse a esta triste conclusión: a los actuales governantes d’Asturies nun-yos interesa qu’esista una industria asturiana del cine y del audiovisual potente porque ye un sector industrial y cultural que nun controlen, manexen o mangoneen pa medrar o aprovechase dél. Como la situación del cine y audiovisual asturianu empeore yo y munchos más vamos entamar a pensar qu’esta conclusión puede ser la más axeitada y verdadera.