La primera vez que probé la sidra foi contigo.
Un culín que rellumaba como si nel vasu cayera una estrella,
(yera de nueche).
Y saboriámoslo xuntos,
compartimos vasu,
y amor,
y música.
Agora, dempués de tantos abriles, y mayos, y avientos…
aquel momentu forma parte de les coses perdíes
que s’aníen pa siempres na memoria.
Y ahí tas tú, bromiando cola sidra,
y deprendiéndome l’arte d’escanciar con xeitu.
(Perfeicionista, como en too).
Son deliciosos los besos con sabor a esti elixir áureo,
magar que la mazana fuera pa Eva’l frutu prohibío.
Qué esquisitu arume qu’empapa la fiesta y el deséu.
Qué esencia agridulce qu’envizca y alimenta suaños.
Qué color dorao que tiñó los míos didos
aquel día de branu.
Y estampóse nel instante
un puntu brillosu nel mapa de la mío xeografía.
Y la espuma,
con formes exótiques,
como un cuadru pintáu, distintu, cada vez.
Inda siento l’españíu del momentu
nel vasu finu y tresparente.
Quiciabes porque tamién restalló l’amor.
Agora, siempre que compartimos un culín,
Siempre na mía memoria la primera vez,
la estrena, sí, la estrena ente sidra y besos.
La sidra y tu, siempre nel mío paisaxe d’amor.
(Sidra. E. Pata Negra, 2023)
