12.4 C
Oviedo
jueves 28, marzo 2024

Les Marzes n’Asturies

Lo más leído

¡Haz clic para puntuar esta entrada!
(Votos: 0 Promedio: 0)

Les Marzes son unos cantos de ronda que facíen los mozos varones solteros la última nueche de febreru o la primera de marzu cantando coples y pidiendo agilandu peles cases especialmente onde vivieren mozes guapes.
Esta vieyísima tradición de Les Asturies celebra la llegada de marzu a les doce la nueche, primer mes del añu romanu, les calendes de marzu, dedicáu a Marte y a los solteros. L’orixe pue ser pre-romanu yá que na cultura celta tolos primeros de mes yeren sagraos.
El grupu de mozos tenía un xefe que guiaba y un guirriu o zamarrón y al mesmu pertenecíase dende los quince años hasta que se casaben. El fin yera dir d’un sitiu a otru al atapecer p’atrayer l’atención y l’amor de muyeres o futures esposes. Nes canciones pidíense regalos, comida o dineru, a les mozes y families en señal d’aceptación:
«A cantar les marzes toos xuntos venimos
y a les buenes mozes les marzes pidimos.»
Ún de los cantos principales yera’l «Romance de los sacramentos del amor» onde se pidía claramente matrimoniu.
La función antropolóxica de les Marzes ye servir de mecanismu d’estructuración social, permitir conocer a la sociedá cuáles yeren les mozes que más gustaben a los mozos y les que menos o incluso saber a cuáles rechazaben. Asociao a les Marzes ye’l vezu d’enramar pela nueche les cases y balcones de les mozes más guapes, que la Ilesia intenta asociar sólo a la festividá de Ramos, y con ciertu éxitu, pa desaniciar el significáu sexual d’estos enramaos. Los primeros ramos y flores de la primavera yeren pa engalanar les cases de les mozes más deseyaes: mimoses y riestres vexetales servíen pa colgadiellos nos sos balcones y ventanes. Pero esta fiesta masculina tamién podía ser mui cruel: les mozes non gayasperes o non casaderes recibíen enramaos con repollos o panoyes seques especialmente p’aquelles dames más desdeñoses colos varones o pa los que nunca regalaben nada. Cola comida y dineru recibío los mozos organizaben toa una fiesta de domingu convidando a mozes, neños, families y conocíos importantes onde había hasta corderaes.
Los enramaos facíense de nueche y a escondíes pero los cantos yeren delantre les cases durante la cena pa llamar l’atención. Que la moza respondiera a los cantos con dalgún regalucu (una simple cinta), amás d’un xestu d’elegancia o gratitú podía interpretase como un signu d’aceptación d’un posible romance. Podía nun regalar nada pero lo peor yera dar comida o morciella podre a los mozos. Yera toa una señal.
Amanecer cola casa enramada de flores yera un «honor». Como les preferencies solíen coincidir había siempre una casa más enramada qu’otres. Ello significaba que la moza más «enramada» podía elexir al mozu qu’ella quixera pues yera la más preferida. Y la moza menos «enramada» sabía que tendría menos posibilidaes.
Los cantos de ronda interpretábense ensin instrumentos y díbase mui elegante y sobrio. Que los mozos entonaren bien yera señal de que nun taben bebíos y que podíen ser bonos maríos.
Estes costumes sobrevivieron non sólo nes Asturies sinón tamién nel norte de Burgos, Palencia y Lleón.Les Marzes n’Asturies

La función antropolóxica de les Marzes ye servir de mecanismu d’estructuración social, permitir conocer a la sociedá cuáles yeren les mozes que más gustaben a los mozos y les que menos o incluso saber a cuáles rechazaben. Ye un mecanismu d’integración y relación social, una especie de xuegu de votaciones o preferencies pa calcular los futuros empareyamientos y entamar futuros noviazgos y pa saber cuála yera la moza más deseyada de cada zona. Estos mecanismos d’intercomunicación social van despaeciendo según van perdiendo rixidez los procesos o protocolos de comunicación afectiva y sexual y cuando surden otres formes culturales de relación como les discoteques o la telefonía simplificando les relaciones interpersonales, quedando anguañu relegaes estes formes socioculturales a manifestaciones tradicionales que pasen a formar parte del folclor. Les Marzes yeren tamién una fiesta ritual primaveral, de fechu «dir de ronda» significa dir de folixa o parranda. Les formes de relacionase ente grupos y persones d’unu y otru xéneru tamién cambien y s’adapten a un entornu sociocultural de mayor lliberalidá y permisividá nes relaciones afectives, pero antañu yera impensable facer un noviazgu secretu ensin que los padres tuvieren conocencia. La función de les Marzes ye ser un mecanismu d’intercomunicación establecíu na propia estructura social y aceptáu que permitía a los padres y families ponese al corriente de posibles o futuros tratos. Un llinguaxe simbólicu mui útil y prestosu sobre les preferencies, voluntaes y deseyos de mozes y mozos.

¡Haz clic para puntuar esta entrada!
(Votos: 0 Promedio: 0)

Más del autor /a

DEJA UNA RESPUESTA

Por favor ingrese su comentario!
Por favor ingrese su nombre aquí

- Publicidad -

Últimos artículos