Una xeneración lliteraria defínese como un conxuntu persones nacíes nun determináu tiempu que vivieron los mesmos acontecimientos y que puen presentar una obra lliteraria con influencies, caracteres y rasgos asemeyaos y estremaos de xeneraciones anteriores.
Tener una edá asemeyada nun contestu determináu favorez pañar unes mesmes perspectives.
Los escritores de la Xeneración del Compromisu (1967-1982) són escritores en llingua asturiana, una llingua non reconocida oficialmente en cuasi tol so dominiu y marxinada. Estos autores nun participaron nos primeros movimientos del Surdimientu como Conceyu Bable y tampoco na formación de l’Academia de la Llingua. Ayenos al conflictu ente partidarios y críticos de la normativización, són por ello más favoratibles a nun dar demasiada importancia a esti fechu. Entamen publicar a entamos de los años 1990 alrodiu los ámbitos de l’Academia. Tamién se nos conoz como la Xeneración de los Noventa. Formamos la primer xeneración d’asturianos instruyida na etapa de recuperación democrática del país y la primer xeneración que vive’l llogru de la normativización del idioma pero qu’inda nun ve la normalización social y política del mesmu. Ye por ello una xeneración que vivió inmersa nel conflictu políticu alrodiu l’asturianu y que tomó partíu y conciencia idiomática plena a favor d’una total normalización y oficialidá del asturianu denunciando la marxinación política. Comprometíos cola llingua na qu’escribimos y falamos, nun escaecimos la relación política directa col conflictu que la marxinaba, decatándonos a favor d’una visión global, reivindicativa del raigañu, non esclusívamente llingüísticu, de los problemes del País. La Xeneración del Compromisu espresa un deseyu d’alitar Les Asturies, la so llingua, volcándose’l llabor lliterario a través d’una nueva y valiente inspiración. La obra de los autores de la Xeneración del Compromisu amuesa un deséu de recuperar el terrén perdíu, les esperances escaecíes, los raigaños más esterraos, el sentimientu más autóctonu y fondu d’una tierra, d’una llingua que nun se quier perder nin escaecer. Una nueva mirada hacia Asturies y hacia la so llingua. Tórnase asina a la idea física de patria asturiana como tierra y yá non como llingua, como infancia o como alcordances; a la idea física d’exiliu como distancia y non yá como escaezu, piénsase más nel futuru que na nenez del pasáu. Nun hai dicotomía campu-ciudá, la patria ye un too insepartable. La idea del amor espórtase a toles realidaes, hacia les idees, los sentimientos o les coses. Aspírase a obtener un futuru onde la llingua, el progresu, les idees, la Tierra asturiana con mayúscula y los sentimientos d’autoafirmacíón tean plenamente afitaos y reconocíos. Tamos nuna xeneración lliteraria de raigañu conceptual, d’un nuevu compromisu ampliu con Les Asturies, cola llingua y yá non sólo cola lliteratura asturiana como presumíen los de la xeneración anterior. Tamos yá nuna xeneración artística que quier superar conflictos allugando a Asturies en sitiu primeru.
Una xeneración qu’entamó no poético, abriéndose hacia lo narrativo. Como actu fundacional d’esta xeneración ta la publicación en 1998 del volume Muestra de nueva poesía. Ye una lliteratura comprometida, con espíritu, afinxada na tierra, pues pretende tornar la güeyada hacia Asturies y non hacia lo universal. Los autores de la Xeneración del Compromisu amuesen un frayamientu cola poesía figurativa experimental anterior. La nueva poesía afuxe del prosaísmu hipercultista. Paña influencies del cine, los viaxes, el paisaxe de la Tierra, la cultura asturiana, los medios de comunicación. Supón tou ello que la nueva Xeneración del Compromisu ruempe col nomáu Segundu Surdimientu precisamente na idea de lo que pue representar la lliteratura pa la creación d’una Cultura asturiana. 
XENERACIONES LLITERARIES ASTURIANES: La Xeneración del Compromisu (1967-1982)
