Construyir una vida

0
80
Poesías en Fusión Asturias
[Total: 1   Promedio: 5/5]

Poner una vida en pie
colos son enquívocos,
cola seguranza de nun tar
seique nunca seguru de nada,
cola inconveniencia de
l’absoluta volatilidá de
los suaños humanos,
cola inevitable dependencia
del encaxe con otres vides
que construyen les sos
propies hestories
y suañen los sos propios
suaños, ye quiciabes
la xera más abegosa.
Esa vida ha tener cuartos bien grandes
pa les visites, ventanes
pa nun zarrase nún mesmu,
una antoxana pa guardar
les distancies y despidir
a los que mos dexen
con comodidá. Un teyáu
fuerte pa cuando’l tiempu
venga lluviosu o con ñeve
–que nun sedrá poques vegaes–
y unes paredes grueses pero llixeres,
pa ser quien a abrir
puertes nueves y ventanes
con perspectives anovaes.
Esa vida ha tar
bien comunicada con
caminos que lleven a
otres, y amoblada al
nuesu gustu, pa tar
felices nella, tratando
garrar les menos zunes
posibles.

Inaciu Galán, del poemariu Nes ruines de la nueche y les hores (Trabe, 2018)

DEJA UNA RESPUESTA

¡Por favor, introduce tu comentario!
Por favor, introduce tu nombre aquí