Viaxe interior

Débo-y a esti gris metío n’agua
que nos dexa abril
la señaldá del sol entrando pela ventana
de la escuela,
y otra vez camín de casa, a escape,
pa facer los deberes.
Curtiu viaxe que la memoria borra
y agora recuerdo
cuando yá nun queda casa, nin manes tebies
que m’aguarden.
Vacíos que’l tiempu tapa cola yedra
más puro,
frontera vexetal que cuida de la piedra
que me vió pasar
n’otru tiempu, afalándome per siendes
de fueya seco.
Curtiu camín, ecu de pisaes vieyes
que m’espierten
agora que l’agua arrastra esta tierra,
ceniza del llar
que calecíó abondos suaños de neñu.