Iniciativa pol Asturianu amplía esti añu la so presencia na Feria Internacional de Muestres
Nesta edición, nel stand de la organización van participar once empreses de diferentes sectores qu’utilicen l’asturianu na so actividá comercial.
L’espaciu d’Iniciativa pol Asturianu va contar amás con un apartáu pa presentaciones y charres.
Nesta edición, que va cellebráse del 3 al 18 d’agostu en Xixón, van tar presentes once empreses de diferentes sectores qu’utilicen l’asturianu na so actividá comercial y tovía hai dalgún espaciu llibre por si dalgún profesional o empresa quier sumase. Al traviés de la presencia na FIDMA, Iniciativa pol Asturianu quier mostrar como l’asturianu ye un elementu de creación empresarial, orixinando actividá económica, puestos de trabayu y, polo tanto, riqueza. Amás, con tola variedá de productos y servicios de les empreses, la organización quier facer ver como la llingua asturiana puede ser un elementu de diferenciación y qu’aporta un valor añadíu a los productos y servicios qu’ufierten estes empreses.
Iniciativa pol Asturianu, que nun recibe nengún tipu d’ayuda pública, amplía amás el so stand na FIDMA que va contar con un espaciu pa charres, presentaciones de llibros, actos culturales, actos d’empreses y visites institucionales. La organización quier qu’esti espaciu seya un llugar d’alcuentru y un escaparate a la sociedá de la importancia que tien l’asturianu na economía asturiana.
Iniciativa pol Asturianu presentó en Bimenes los sos documentales sobre la represión llingüística y el valir económicu de la llingua asturiana
La organización siguió cola so campaña de sensibilización sobre la represión llingüística y cómo l’asturianu ye una fonte de xeneración de riqueza.
Iniciativa pol Asturianu siguió cola so campaña de sensibilización sobre la situación del asturianu. Nesta ocasión en Bimenes, la ONG organizó una proyeición de los sos documentales sobre la represión llingüística y el valir económicu de la llingua asturiana que valió tamién pa dar entamu a los actos de la XXIII Fiesta de la Oficialidá del conceyu yerbatu.
D’esta manera, la organización sigue cola so campaña de sensibilización sobre la represión llingüística cola proyeición del documental “La vida ensin oficialidá. Les consecuencies de la falta de drechos llingüísticos n’Asturies” nel qu’apaecen dellos casos onde la falta d’oficialidá provoca situaciones y problemes qu’atopen los falantes d’asturianu a lo llargo de la so vida.
Nesta ocasión tamién proyectose’l nuevu documental “El valir económicu d’una llingua” presentáu nel II Seminariu sobre la oficialidá organizáu por Iniciativa n’Uviéu el pasáu mayu. Esti audiovisual presenta al asturianu como un elementu de dinamización nel mundo empresarial y convertise d’esta manera nuna manera de xenerar empreses, empleu y polo tanto, riqueza. Nel documental apaecen delles empreses de diferentes sectores qu’ufierten los sos servicios y productos n’asturianu siendo l’idioma un elementu qu’aporta en positivu y conviertése nun valor diferencial y añadíu nos productos o servicios.
L’actu valió pa dar iniciu a les actividaes organizaes pol conceyu de Bimenes pa celebrar la XXIII Fiesta de la Oficialidá.