Los Astures, la xénesis d’un pueblu

Los Ástures son el pueblu celta que-y dio nome a Asturies y son l’orixen de la so historia cultural. El país de los Ástures algamaba los actuales territorios provinciales d’Asturies, Lleón y parte de los de Zamora, Ourense y Miranda. Los ríos Dueru y Ástura (Esla) facíen de frontera d’esti país, Asturia, que pa dalgunos investigadores significa «país del agua». Vivíen básicamente de la caza, la pesca, la recoyida de frutos, el ganáu, l’agricultura, el comerciu, la minería y tamién trabayaben la metalurxa de los metales, l’oru y la plata. La minería tendría tamién muncha importancia, viendo la cantidá de crisoles y fornos que ta surdiendo nos yacimientos arqueolóxicos, amás del bayurosu desenvolvimientu de la metalurxa y orfebrería ástur. Semaben trigu, llinu y cebada de la que facíen una clas de cerveza. Tamién facíen un llicor de mazanes asemeyáu a la sidra, y molíen una farina del llande que ye’l frutu del carbayu, cola que facíen un pan que se conservaba abondu tiempu. Modernes escavaciones tán descubriendo nuevos tipos de vivienda ástur a base de xebatu con barru y basa de piedra.Tamién trabayaben los metales pa facer potes y otros utensilios y adornos. Nun conocíen la escritura yá que la so cultura yera de tradición oral conservada polos druídes y los bardos como nel restu del mundu celta. La so relixón yera típicamente céltica pues yera naturalista, basada nel elementu acuáticu y na dualidá sol-lluna, con abondos seres mitolóxicos.
El sistema familiar taba organizáu nel matriarcáu, onde la muyer heredaba y yera propietaria. Nel so sistema matriarcal, non sólo la herencia y la constitución de la familia se rixen per llinia femenina, sinón que tamién la muyer ye la propietaria, y ello supón una preponderancia de la familia de la muyer, más que dominiu d’ésta mesma, esto ye, l’autoridá del tíu maternu na organización familiar. Vivíen en castros fortificaos, allugaos en sitios estratéxicos pa defendese, onde teníen cabanes circulares nes zones de monte y cuadraes nes zones llanes. De la llana d’oveya facíen texíos pa vestise. Los homes llevaben el pelo llargo y gastaben torques d’oru que llucíen nel pescuezu como xoya de prestixu. Conocíen perbién les plantes melecinales y teníen como árboles sagraos al texu y al carbayu. Yeren famosos los sos caballos asturcones y yeren perbonos xinetes. Usaben abondes armes como los dardos y les falcates y escudos defensivos siempre redondos. Teníen trés tipos de caballos, dos emparentaos col actual asturcón, ún de los valles y otru más pequenu de les montañes, y ún cebráu autóctonu al que daben caza que s’estingió. Pa lluchar los homes recoyíense’l pelo con cintes. La muyer llabraba la tierra mentantu que la caza y pesca yera una xera más masculina. Tamién yeren navegantes y usaben unes barques grandes feches con cueru onde sólo la quilla yera de madera. Ciudaes importantes yeren Lucus Asturum, Noega, Lancia, Flavionavia o Astúrica. Según Piliu, la población d’Asturia yera de 240.000 persones, 10 habitantes por kilómetru cuadráu.
Historiadores romanos y griegos como Pliniu, Mela, Estrabón o Ptolomeu falen abondo de los Ástures como nación y del so territoriu d’Asturia. Cuenten que la nación de los Astures taba formada por ventidós tribus principales: Lugones, Cilúrnigos, Albiones y Pésicos na Asturia trasmontana y otres como los Amaci, Bedunios, Briguencinos, Guigurros, Lancienses, Lugueos, Orniacos, Selmas, Superatos, Tiburos o Zoelas allugaos na Asturia cismontana. Los romanos camudaron el país de los Astures nel Conventu Asturum depués de la conquista y ficieron d’Astúrica Augusta la so capital que foi un antigu castru ástur. Los Astures falaben una llingua d’orixe celta y pre-celta, l’astúricu, asemeyada al lusitanu. De la llingua celta de los ástures conservamos palabres n’asturianu modernu como brenga, boroña, bierzu, argaña, abeduriu, esbardu, bregar, llabiegu, combayar o miruéndanu amás d’abondos topónimos y nomes de llugar como Cermuñu, Beleñu, Candamu, Deva, Pintueles, Tarañes, Teberga, Bedón, Boudenaya, Dobra, Navia, Doiras…
Los castros son poblaos fortificaos de la Edá del Fierru afitaos dende’l sieglu VI enantes de la Nuesa Era. Les necesidaes defensives condicionen la elección de los llugares siempre en sitios d’accesu abegosu: cantiles na costa, cuetos o montes dominantes. Usaben escudos pequenos y redondos, el puñal y la espada corta d’antenes, llances d’estoque, hondes y hachos de doble filu. Facíen la griesca de guerrilles con gran astucia y valor. Famosos fueron los caballos ástures tanto pa la guerra como pa les carreres. Usaben barques de cueros cosíos y de moneda podíen usar trozos de plata cortaos. Les condiciones defensives naturales compléntense con muries y fosos. Importantes castros ástures son La Campa Torres (Xixón), Castiellu de Moriyón (Villaviciosa), Castiellu de Llagú (Uviéu), Castru de San Chuis (Allande), Camoca, San Martín, El Picu la Mina, San Isidro, Coaña, Pendia, Lancia. Inda queden abondos poblaos ástures ensin escavar como Lucus Asturum.
L’arquitectura más típica de les sos cases o cabanes son de planta circular o arrondiada, anque tamién hailes cuadraes, constrúyense en mampostería, el llar asítiase en posición central y caracterícense por ser aisllaes, ensin murios medianiles con otres cortstrucciones; les sos cubiertes sedríen vexetales, de piornu o paya (payozes) anque tamién con lloses. Modernes escavaciones tán descubriendo nuevos tipos de vivienda ástur a base de xebatu con barru y basa de piedra, asemeyada a les viviendes celtes d’Irlanda y Britania. Son famoses les esteles discoidales na mayoría de los recintos cívicos: Cabañaquinta, Cuaña, Collía, Corvera, Oles, Ponga y Villaviciosa, toes de piedra anque debió habeles tamién d’otros materiales menos duraderos. Les muyeres vestíen con teyíos decoraos y mui collorios y los homes llevaben sayes prietes y el pelo llargo que pa combatir lo recoyíen con una fuerte banda. El calzáu sedría asemeyáu a les abarques qu’inda güei s’usen. Conocíen les propiedaes tóxiques y melicinales de les plantes como los frutos del texu. L’elementu más característicu de la celtidá de los ástures ye la presencia de los famosos torques d’oru y plata, collar d’adornu masculín, símbolu cultural del pueblu ástur. El cultu a los ríos ye otru elementu celta: orniar les fontes ye una herencia cultural ástur. Nel conceyu de Candamu descubriéronse hasta agora cuatru castros ástures: Prahúa, Santiso, La Pica’l Castru, y Picu la Mafalla, en Ventosa. El castru abandonáu más tardíamente ye’l de Mohias que siguió habitáu hasta’l sieglu VII. La mayoría los castros de los Astures tán ensin excavar. Nel conceyu de Santu Andrianu los castros «Picu Constanciu» en Les Carangues y «El Collán» en Tenebréu, duraron habitaos hasta la época de la Monarquía asturiana, el Reinu de los Ástures. §